Հայոց Բանակին Մէջ 40 Հոգեւորական Կը Ծառայէ

Մայր Աթոռ Սուրբ Էջմիածնի մէջ Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսը Հոկտեմբեր 17-ին ընդունած է Իտալիոյ Հանրապետութեան պաշտպանութեան նախարար, ծովակալ Ճիամփաոլօ Տի Փաոլայի գլխաւորած պատուիրակութիւնը` ուղեկցութեամբ Պաշտպանութեան փոխնախարար Դաւիթ Տօնոյեանի եւ ՀՀ ԶՈւ հոգեւոր առաջնորդ Տ. Վրթանէս եպիսկոպոս Աբրահամեանի: Այս մասին կը յայտնեն Մայր Աթոռի տեղեկատուական կեդրոնէն:

Հանդիպման ընթացքին բարի գալուստ մաղթելով հիւրերուն համայն հայութեան հոգեւոր կեդրոն Մայր Աթոռ Սուրբ Էջմիածին` Վեհափառ Հայրապետը բարձր գնահատած է երկու երկիրներու պաշտպանութեան նախարարութիւններուն միջեւ ձեւաւորուող համագործակցութիւնը: Ամենայն Հայոց Կաթողիկոսը նկատած է, որ հայ-իտալական դարաւոր բարեկամութիւնը կ’արտայայտուի ոչ միայն պետական, այլեւ եկեղեցական մակարդակով, որուն վկայութիւնն են Հայ Առաքելական եւ Հռոմի Կաթոլիկ Եկեղեցիներու եղբայրական յարաբերութիւնները:

Զրոյցին ընթացքին անդրադարձ կատարուած է նաեւ ՀՀ Զինուած ուժերուն մէջ հոգեւոր հովւութեան: Այս առնչութեամբ Վեհափառ Հայրապետը գոհունակութեամբ արձանագրած է, որ այսօր աւելի քան 40 եկեղեցական իր հոգեւոր ծառայութիւնը կը բերէ հայոց բանակին: Նորին Սրբութիւնը նաեւ նշած է, որ բանակի հոգեւոր սպասաւորները պարբերաբար հնարաւորութիւն կ’ունենան ծանօթանալու այլ երկիրներու մէջ նոյնանման կառոյցներու փորձառութեան:

Ամենայն Հայոց Կաթողիկոսը եւ Իտալիոյ Պաշտպանութեան նախարարը խօսած են նաեւ եկեղեցի-պետութիւն յարաբերութիւններու եւ Լեռնային Ղարաբաղի հակամարտութեան խաղաղ կարգաւորման գործընթացին մասին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button