ՀՀ Նախագահը Ելոյթ Ունեցած է Պուխարեստի Մէջ Եւրոպական Ժողովրդական Կուսակցութեան Գագաթնաժողովին

ՀՀ նախագահ Սերժ Սարգսեան Հոկտեմբեր 17-ին ելոյթ ունեցած է Ռումանիոյ մայրաքաղաք Պուխարեստի մէջ Եւրոպական ժողովրդական կուսակցութեան գագաթնաժողովին: Այս մասին կը հաղորդէ ՀՀ մամլոյ գրասենեակը:

Նախագահ Սերժ Սարգսեանի ելոյթը Եւրոպական ժողովրդական կուսակցութեան համագումարին:

«Յարգելի՛ պարոն Մարթենս,

յարգելի՛ գործընկերներ,

Ինն ամիս առաջ Մարսելի մէջ ԵԺԿ նախորդ համաժողովը ողջունեց հայաստանեան երեք կուսակցութիւններու մուտքը ԵԺԿ մեծ ընտանիք:

Այսօր, իբրեւ Հայաստանի Հանրապետութեան նախագահ եւ Հայաստանի հանրապետական կուսակցութեան ղեկավար, պատիւ ունիմ առաջին անգամ պաշտօնապէս դիմելու ԵԺԿ համաժողովին: Շնորհակալ եմ բոլոր ներկաներուն եւ յատկապէս նախագահ Մարթենսին` մեր անդամակցութեան գործին մէջ ցուցաբերած աջակցութեան համար: Միաժամանակ շնորհակալութիւն կը յայտնեմ նախագահ Պասեսգուին` այս տարեկան հաւաքը հիւրընկալելու եւ հրաշալի կազմակերպելու համար:

Օգտուելով առիթէն` կը փափաքիմ շնորհաւորել Եւրոպական միութեան ղեկավարութիւնը եւ անդամ պետութիւններու քաղաքացիները` Նոպէլեան խաղաղութեան մրցանակին արժանանալու առիթով: Մրցանակի շնորհումը գնահատանքն է այն աւանդին, որ Եւրոպական միութիւնը ստանձնած է խաղաղութեան ամրապնդման եւ զարգացման գործին մէջ:

Հայ ժողովուրդը եւրոպական քաղաքակրթութեան անբաժանելի մասն է իր անցեալով, մշակոյթով, ի վերջոյ` իր ներկայ նպատակադրումներով եւ իղձերով: Հայաստանեան կուսակցութիւններու անդամակցութիւնը ԵԺԿ-ին կը բխի մեր ընդհանուր քրիստոնէական ժառանգութենէն, ինչպէս նաեւ հիմնարար ազատութիւններու, ժողովրդավարութեան եւ մարդու իրաւունքներու սկզբունքներուն համատեղ յանձնառութենէն: Եւրոպական ժողովրդական կուսակցութիւնը դարձած է եւրոպական ինքնութեան վերարժեւորման կարեւորագոյն օղակներէն մէկը: Հետեւաբար, մենք կը դիտարկենք մեր անդամակցութիւնը ԵԺԿ-ին` իբրեւ Եւրոպայի հետ ընկերակցութեան գործընթացի կարեւորագոյն բաղադրիչ: Մեր քաղաքական ընտանիքը եւրոպական ընդելուզման շարժիչ ուժն է, ինչպէս նաեւ բարեփոխումներու ջատագովն ու իրականացնողը:

Ուրախ եմ ընդգծելու, որ յատկապէս Արեւելեան գործընկերութեան մեկնարկէն ետք Հայաստան-Եւրոմիութիւն համագործակցութիւնը կը զարգանայ վերընթաց ուղիով` որակական եւ բովանդակային լուրջ յառաջընթաց արձանագրելով համագործակցութեան բոլոր բնագաւառներուն մէջ: Հայաստանը այսօր Արեւելեան գործընկերութեան առաջատարներէն է ե՛ւ Ասոցացման բանակցութիւններու, ե՛ւ նախաձեռնուած լայնածաւալ բարեփոխումներու առումով: Մենք կ’ողջունենք այս գագաթնաժողովի հռչակագիրը Միասնական շուկային վերաբերեալ: Խոր եւ համապարփակ ազատ առեւտուրի գօտիին մասին համաձայնագիրը ապագային Հայաստանին նոյնպէս թոյլ պիտի տայ օգտուելու Միասնական շուկայի հնարաւորութիւններէն:

Հայաստանի կառավարութիւնը վերացուցած է մուտքի արտօնագրեր ստանալու պահանջը ԵՄ եւ Շէնկենեան համաձայնագրի երկիրներու քաղաքացիներուն համար: Յոյսով ենք, որ ներկաները եւ Ձեր երկիրներու այլ հազարաւոր քաղաքացիներ պիտի օգտուին Հայաստան անխոչընդոտ այցելելու այս նոր հնարաւորութենէն:

Մենք ձեռնամուխ եղած ենք բարեփոխումներու համապարփակ ծրագրի մշակման, որուն իբրեւ արդիւնք պիտի ունենանք շատ աւելի արդիւնաւէտ կառավարման համակարգ: Այդ նպատակները իրականացնելու համար Հայաստանը կարիք ունի շօշափելի ֆինանսական աջակցութեան: Այդ իսկ նպատակով Եւրոպական յանձնաժողովի հետ համատեղ կը նախապատրաստենք նուիրատուներու համաժողով Հայաստանի համար:

Յարգելի՛ գործընկերներ,

Մեր երկիրը կը պատրաստուի հերթական նախագահական ընտրութիւններու: Գարնան ընթացքին Հայաստանի մէջ կայացած խորհրդարանական ընտրութիւնները միջազգային դիտորդներու կողմէ որակուեցան իբրեւ լաւագոյնն անկախութեան հռչակումէն ի վեր: Հայաստանի Հանրապետութեան իշխանութիւնները հաստատակամ են արձանագրուած յառաջընթացը դարձնելու հաստատուն միտում եւ յառաջիկային իրականացնելու ազատ, արդար, թափանցիկ եւ ժողովրդավարական նախագահական ընտրութիւններ: Այդ նպատակով, կը ձեռնարկուին նախապատրաստական քայլեր` հիմք ընդունելով ԵԱՀԿ/ԺՀՄԻԳ եզրակացութիւններն ու առաջարկները: Աւելորդ կը համարեմ նշել, որ այս անգամ եւս կ’ակնկալենք միջազգային դիտորդներու աշխոյժ մասնակցութիւն:

Յարգելի՛ տիկնայք եւ պարոնայք,

Հարաւային Կովկասի տարածաշրջանի անվտանգութիւնը եւրոպական անվտանգութեան անբաժանելի մասն է: Մենք այլընտրանք չենք տեսներ փոխզիջումներու հիման վրայ ԵԱՀԿ Մինսկի խումբի ծիրէն ներս Լեռնային Ղարաբաղի հիմնահարցի խաղաղ կարգաւորման գործընթացին: Վերջերս Եւրոպական միութեան անդամ երկրի կողմէ արտայանձնուած մարդասպանը հերոսացնելով` Ատրպէյճանը մարտահրաւէր նետեց ողջ քաղաքակիրթ մարդկութեան, մէկ անգամ եւս ապացուցեց, որ այլատեացութիւնը այդ երկրի պաշտօնական քաղաքականութիւնն է եւ անմիջական սպառնալիք Լեռնային Ղարաբաղի ժողովուրդի անվտանգութեան համար:

Յարգելի՛ գործընկերներ,

Տնտեսական ճգնաժամը լրջագոյն սպառնալիք է ինչպէս Եւրոպական միութեան երկիրներու, այնպէս ալ գործընկեր պետութիւններու համար: Նման ծաւալի ճգնաժամը հնարաւոր չէ յաղթահարել միայնակ: ԵԺԿ այս տարուան գագաթնաժողովին խորագիրը չափազանց արդիական է. այս մարտահրաւէրին պատասխանն է` «աւելի շատ Եւրոպան», պատասխանն է` աւելի համախմբուած Եւրոպան եւ աւելի ամուր յանձնառութիւնը եւրոպական գաղափարներին ու համերաշխութեան: Միայն նման Եւրոպան պիտի կրնայ յաղթահարել ներկայ տնտեսական ճգնաժամը եւ նոր հնարաւորութիւններ բանալ մեր հասարակութիւններու բարեկեցութեան համար:

Շնորհակալութիւն ուշադրութեան համար:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL