Սփիւռքահայ Գործարարը 1.5 տարի է` Չի Կրնար Վերականգնել Իր Ոտնահարուած Իրաւունքները

 Գործարար Էտմոնտ Խուտեան, որ Հայաստանի մէջ շինարարութեան ոլորտին մէջ գործ սկսած էր եւ խաբուած էր, շուրջ 1.5 տարի է` չի կրնար վերականգնել իր ոտնահարուած իրաւունքները: Այս մասին կը հաղորդէ PanARMENIAN.Net-ը:

Սփիւռքահայ գործարարը իր երկրորդ նամակն է, որ ուղարկած է ՀՀ Ազգային ժողով, քանի որ Սփիւռքահայ ներդրողներու շահերու պաշտպանութեան նախաձենող խումբի հասարակայնութեան հետ կապերու պատասխանատուին եւ ՀՀ ԱԺ կարգ մը պատգամաւորներու միջեւ տեղի ունեցած զրոյցներէն պարզ դարձաւ, որ պատգամաւորները գործարարին կողմէ դեռ այս տարուան Սեպտեմբեր 28-ին ուղարկուած նամակէն տեղեակ չեն: Նամակին մէջ գործարարը, մասնաւորապէս, գրած է. «Յարգարժան Ազգային Ժողովի պատգամաւորներ,
«Կը դիմեմ ձեզի ԱՄՆ-էն: Հայաստանի մէջ գործադիր իշխանութեան եւ անոր ածանցեալ դատական համակարգին մէջ օրէնքի կիրառման հարցով իմ բոլոր փորձերս փակուղ կը տանին եւ դիմելով ձեզի, կը հայցեմ ձեր աջակցութիւնը:

«Խումբ մը անձիք իմ կողմէս հիմնադրուած «Արին քափիթըլ» ներդրումային ընկերութենէն (Մաշտոցի 33) իւրացուցած են $8,500,000 տոլարի անշարժ գոյք եւ գումար, որմէ $1,500,000 տոլարին համարժէք գումար նախատեսուած էր պետութեան յարկերը վճարելու համար: Այդ խումբին կողմէ յարկեր վճարելէն չարամտօրէն խուսափելու նպատակով եւ ընկերութեան կանխամտածուած սնանկութեան տանելու վերաբերեալ 2010-ի Նոյեմբերին դիմած եմ ՊԵԿ նախագահ Գագիկ Խաչատրեանին` յոյս ունենալով, որ գոնէ չվճարուած # յարկերը գանձելու նպատակով պետական կառոյցը միջոցներ ձեռնարկէ քրէական գործ յարուցելու եւ մեղաւորները պատասխանատուութեան ենթարկելու համար: Շուրջ 5 ամիս է ոչինչ կատարուած է, սակայն իմ հետեւողական աշխատանքիս շնորհիւ հարցը հանրային հնչեղութիւն ստացաւ եւ 3 Մայիս 2011-ին, ՀՀ քրէական օրէնսգիրքի 193-րդ յօդուածի յատկանիշներով յարուցուեցաւ թիւ 83159711 քրէական գործը:

«Նախ ըսեմ, որ գործ ունինք` սեփականութեան եւ տնտեսական գործունէութեան դէմ ուղղուած յանցագործութիւններուն մէջ մասնագիտակցած, հանրապետութեան բարձրաստիճան պաշտօնեաներու եւ/կամ անոնց հարազատներուն հովանաւորութիւնը վայելող եւ անպատժելիութեան «բարենպաստ» պայմաններուն մէջ գործող արհեստավարժ խումբի մը հետ, որ առ այսօր կը շարունակէ իր գործունէութիւնը: Այդ իսկ պատճառով Պետական եկամուտներու կոմիտէի աւագ քննիչը, գործող դատախազն ու վարչութեան պետը եւ անոնց ղեկավարութիւնը յանցագործները պաշտպանութեան տակ առած են եւ օրէնքը անզօր է անոնց բոլորին դէմ: ՊԵԿ-ին եւ դատախազութեան արդէն յայտնի են ե՛ւ գործող անձերուն շրջանակը, ե՛ւ չվճարուած յարկերը, ե՛ւ խարդախութեան փաստերը, սակայն վերեւներու ազդեցութեան տակ 1.5 տարի շարունակ այս գործը կը ձգձգուի: Յանցաւոր գործունէութեամբ պետութեան պատճառած $1.5 միլիոն տոլարի վնասը վերականգնելու ուղղութեամբ բացառապէս ոչինչ կատարուած է: Աւելին, քրէական գործի ընթացքին վերջերս յանցագործ խումբին հնարաւորութիւն տրուեցաւ ընկերութենէն իւրացնել խումբ մը սփիւռքահայերու պատկանող $2,000,000 տոլար արժողութեան վերջին տարածքները:

«Յարգելի պատգամաւորներ, կը հայցեմ ձեր օգնութիւնը այս գործին ուշադրութիւն դարձնելու եւ համապատասխան միջոցներ ձեռնարկելու համար: Ինչպէս հանրապետութեան Նախագահը նշեց Սեպտեմբեր 15ին, “Գլուխէն եւ Մեծերը բռնելու հնարաւորութիւնը” այս գործին մէջ առկայ է, եթէ ի հարկէ անոնց ոեւէ մէկը բռնելու ցանկութիւնը իրապէս կայ: Եկած է յանցագործներուն մեղադրանք առաջադրելու ժամանակը, սակայն վերեւները գտնուող բարձրաստիճան պաշտօնեաները թոյլ չեն տար յանցագործները պատասխանատուութեան ենթարկել, հասկանալի պատճառներով:

«Ես եւ իմ փաստաբաններս Լեռնիկ Յովհաննիսեանն ու Նիքոլա Պաղտասարեանը պատրաստ ենք փաստերը ձեզի ներկայացնելու համար: Ասիկա իմ պաշտօնական բողոքս է Հայաստանի Հանրապետութեան:

«Շնորհակալ եմ, յարգանքներով՝

Էտմոնտ Խուտեան»:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button