Պերլինի Պետական Գրադարանը Կը Համալրուի Մօտ 500 Հայերէն Նոր Գրքերով

Ազգային ժողովի գիտութեան, կրթութեան, մշակոյթի, երիտասարդութեան եւ սփորթի հարցերու մշտական յանձնաժողովի նախագահ Արտակ Դաւթեան Հոկտեմբեր 18-ին հանդիպում ունեցած է Պերլինի պետական գրադարանի գլխաւոր տնօրէն Պարպարա Շնայտըր-Գեմբֆի հետ: Այս մասին կը տեղեկացնէ ԱԺ հասարակայնութեան եւ տեղեկատւութեան միջոցներու հետ կապերու վարչութիւնը:

Ողջունելով հիւրը Ազգային ժողովէն ներս` Արտակ Դաւթեան նշած է, որ Հոկտեմբերը Հայաստանի խորհրդարանին մէջ նշանաւոր կը դառնայ Գերմանիոյ առնչուող ձեռնարկներով եւ գերմանացի գործընկերներու այցելութիւններով. այդ բոլորի տրամաբանական շարունակութիւնն է նաեւ Պերլինի պետական գրադարանի գլխաւոր տնօրէնին այցը Հայաստան եւ ՀՀ Ազգային ժողով:

Շնայտըր-Դեմվֆի` շնորհակալութիւն յայտնելով Հայաստանի մէջ հանդիպած ջերմ ընդունելութեան համար` պատմած է այն ծրագրերուն մասին, որոնք ունի Պերլինի պետական գրադարանը` առնչուած Հայաստանի, հայկական մշակոյթի հետ: Անոր խօսքով` այդ գրադարանին մէջ կը պահուի Գերմանիոյ մէջ հայ գրականութեան ամենամեծ ֆոնտը` շուրջ 10 միլիոն գիրք, եւ ամէն տարի Պերլինի պետական գրադարանը կը համալրուի մօտ 500 նոր հայերէն գիրքերով: Ըստ Շնայտըր-Գեմբֆիի` Հայաստանի ազգային գրադարանին հետ ստորագրած յուշագիրին ծիրէն ներս պիտի իրականացուին համատեղ ծրագրեր, պիտի կազմակերպուին փոխայցելութիւններ, պիտի ըլլայ փորձի փոխանակում: Պերլինի պետական գրադարանի ծրագիրին մէջ ընդգրկուած են հայ գրականութեան երկու ցուցադրութիւններ` նուիրուած 2012-ին Երեւանը ԵՈՒՆԵՍՔՕ-ի կողմէ գիրքի համաշխարհային մայրաքաղաք հռչակուելուն:
Խօսելով հայ-գերմանական մշակութային առնչութիւններէն` ԱԺ գիտութեան, կրթութեան, մշակոյթի, երիտասարդութեան եւ սփորթի հարցերու մշտական յանձնաժողովի նախագահը նկատած է, որ համաշխարհային գրականութեան, մշակոյթին մէջ գերմանականը ունի իր առանձնայատուկ տեղը, եւ անոր պահպանման գործին մէջ իր փոքրիկ ներդրումը ունեցած է նաեւ հայ ժողովուրդը: Հայաստանի Հանրապետութիւնը օրինակ ծառայած է յետխորհրդային տարածքի երկիրներուն համար` անկախացումէն անմիջապէս ետք Գերմանիոյ վերադարձնելով պատերազմէն մնացած մշակութային արժէքները: Արտակ Դաւթեանի խօսքով` այս փաստը ցոյց կու տայ, թէ հայը ինչպէս կը վերաբերի մշակութային արժէքներուն եւ ինչպէս պիտի ուզէ, որ վերաբերէին նաեւ միւսները:

Գերմանացի հիւրը հետաքրքրուած է Հայաստանիմէջ գերմաներէնի ուսուցման դրուածքով: Արտակ Դաւթեան տեղեկացուցած է, որ գերմաներէնը` իբրեւ օտար լեզու, կ’ուսուցանուի հայկական դպրոցներու մէկ մասին մէջ, տարբեր ծրագրերով տարեկան շուրջ 100 հայ ուսանող կը մեկնի` կրթութիւն ստանալու Գերմանիոյ մէջ, Երեւանի մէջ յաջողութեամբ կը գործէ գերմաներէնի ուսուցման կեդրոն: Ան նաեւ նշած է, որ իբրեւ Հայաստան-Գերմանիա բարեկամութեան միջխորհրդարանական խումբի ղեկավար` պիտի փորձէ յաղթահարել գերմաներէնի բարդութիւնը եւ այդ լեզուն սորվելով` օրինակ ցոյց տայ միւսներուն:

Հանդիպման ընթացքին քննարկուած են այլ հարցեր եւս:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL