Հայաստանի եւ ԵՄ Միջեւ Մուտքի Արտօնագրման Դիւրացման եւ Յետընդունման Համաձայնագրերը Նախաստորագրուած են

Պրիւքսէլի մէջ ԵՄ-ի մէջ ՀՀ ներկայացուցչութեան ղեկավար, դեսպան Աւետ Ադոնց եւ Եւրոպական յանձնաժողովի ներքին գործերու գլխաւոր տնօրէն Սթեֆանօ Մանսերուիսի այսօր նախաստորագրած են Հայաստանի եւ Եւրոպական Միութեան միջեւ մուտքի արտօնագրերու դիւրացման եւ յետընդունման համաձայնագրերը: Կը նախատեսուի, որ նշուած համաձայնագրերը պիտի ստորագրուին ընթացիկ տարուան Դեկտեմբերին եւ վաւերացման փուլ պիտի մտնեն 2013-ի առաջին կիսուն:
Այս մասին կը հաղորդեն ԱԳՆ մամուլի եւ տեղեկատւութեան վարչութենէն:

Մուտքի արտօնագրերու դիւրացման համաձայնագիրով ՀՀ քաղաքացիներուն համար կը նախատեսուին Շէնկենեան գօտիի երկիրներ մուտքի արտօնագրեր ստանալու դիւրացուած ընթացակարգեր: Համաձայնագիրով ԵՄ երկիրներ պարզեցուած մուտք կը նախատեսուի շարք մը դասակարգերու ՀՀ քաղաքացիներու համար, մասնաւորապէս` պաշտօնական պատուիրակութեան անդամներու, գիտնականներու, ուսանողներու, լրագրողներու, սփորթի եւ արուեստի գործիչներու, ԵՄ երկիրներու մէջ օրինական բնակութիւն ունեցողներու մերձաւոր ազգականներու, ԵՄ երկիրներու մէջ գործող հայկական սփիւռքի կառոյցներուն կողմէ կազմակերպուող ձեռնարկներու մասնակիցներու, եւ այլոց համար:

Կը նախատեսուի նաեւ նուազեցնել Շէնկենեան մուտքի արտօնագրի գինը` դարձնելով 35 եուրօ, ինչպէս նաեւ զայն դարձնել անվճար շարք մը դասակարգերու քաղաքացիներու, ներառեալ` երեխաներու եւ թոշակառուներու համար:

Յետընդունման համաձայնագիրով պիտի կարգաւորուի ԵՄ եւ Հայաստանի տարածքին առանց թոյլտւութեան բնակող անձերու վերադարձի եւ յետընդունման ընթացակարգերը:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button