Իպրահիմի Խաղաղութեան Նոր Կոչով Դամասկոս Պիտի Այցելէ

ՄԱԿ-ի եւ Արաբական Լիկայի Սուրիոյ հարցով յատուկ պատուիրակ Լախտար Իպրահիմի միջինարեւելեան երկիրներու իր շրջապտոյտը շարունակելով՝ Յորդանան ժամանեց եւ տեսակցութիւն մը ունեցաւ արտաքին գործոց նախարարին ու այլ պաշտօնատարներու հետ, ապա յայտարարեց, թէ յառաջիկայ քանի մը օրերուն, նաեւ Դամասկոս պիտի այցելէ՝ Ատհա տօնի օրերուն առնուազն ժամանակաւոր զինադադար մը հաստատելու իր կոչը անձնապէս փոխանցելու համար Սուրիոյ իշանութեանց եւ ընդդիմադիրներուն:

Իպրահիմի Չորեքշաբթի օր Լիբանան այցելած է՝ հանդիպումներ ունենալով հանրապետութեան նախագահին, վարչապետին ու խորհրդարանի նախագահին հետ: Նախագահ զօր. Միշել Սըլէյման յոյս յայտնած է, որ Սուրիոյ տագնապը կարելի կ՛ըլլայ շուտով լուծել երկխօսութեան ճամբով, այլ ոչ թէ զինուորական միջոցներով կամ արտաքին միջամտութեամբ:

Վարչապետ Նեժիպ Միքաթի իր կարգին մաղթած է, որ Սուրիոյ տագնապի լուծման առումով ի գործ դրուող ջանքերը դրական արդիւնքի մը յանգին եւ կարելի ըլլայ քաղաքական լուծում մը ապահովելը:
Հանդիպումներէն ետք տրուած մամլոյ ասուլիսի մը ընթացքին, Իպրահիմի շեշտած է, որ Սուրիոյ տագնապը կարելի պիտի չըլլայ այդ երկիրի սահմաններուն մէջ պահել: «Կա՛մ այդ տագնապը կը լուծուի, կա՛մ կ՛ընդարձակուի՝ այրելով թացն ու չորը», ըսած է ան եւ աւելցուցած, որ ՄԱԿ-ի ընդհանուր քարտուղար Պան Քի Մուն Սուրիոյ զէնք հայթայթող բոլոր պետութիւններէն խնդրած է վերջ տալ այդ երեւոյթին:

Միւս կողմէ՝ Սուրիա յոյս յայտնեց, որ Իպրահիմիի քննարկումները քաղաքացիական պատերազմին վերջ տալու համար «շինիչ նախաձեռնութեան մը» առիթը ընծայեն, սակայն դարձեալ շեշտեց, որ տագնապի երկու կողմերն ալ պէտք է գոյանալիք խաղաղութեան ծրագիրը յարգեն: Սուրիոյ արտաքին գործոց նախարարութեան բանբեր Ճիհատ Մաքտիսի յայտնեց, որ սուրիական կողմը կը սպասէ Իպրահիմիի խորհրդակցութեան արդիւնքները լսելու, յատկապէս այն խորհրդակցութեանց, զորս ան կատարած է «այդ երկիրներուն մէջ, որոնք զինեալ խմբաւորումներուն վրայ բացայայտ ազդեցութիւն ունին»: Մաքտիսի նաեւ ըսաւ, որ արաբական եւ միջազգային նախկին նախաձեռնութեանց ձախողութեան մատնողները զինեալ խմբաւորումներն ու անոնց վրայ ազդեցութիւն ունեցող երկիրներն էին:

Նաեւ, Թուրքիոյ վարչապետ Ռեճէպ Թայիփ Էրտողան նշեց, որ Սէուտական Արաբիա չի փափաքիր մաս կազմել Եգիպտոս-Իրան-Թուրքիա-Սէուտական Արաբիա յանձնախումբի աշխատանքներուն, որովհետեւ Իրանը անոնց մէջ ներառուած է: Այդ պատճառով, Էրտողան առաջարկեց յանձնախումբի գործունէութիւնը եռանդամ ձեւաչափով շարունակել: Ան նաեւ ըսաւ, որ իր կառավարութիւնը առաջարկած է Թուրքիա-Իրան-Ռուսիա, կամ Թուրքիա-Եգիպտոս-Սէուտական Արաբիա մարմիններու կազմութեան քննարկումը:

Իր կարգին, Յորդանանի վարչապետ Ապտալլա Նուսուր հերքեց այն լուրերը, թէ Սուրիա մուտք գործելու համար օտար ուժեր տեղակայուած են Յորդանանի մէջ:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button