Թանգարաններու Միջազգային Խորհուրդի Գիտաժողով` Երեւանի Մէջ

Թանգարաններու միջազգային խորհուրդի կրթութեան եւ մշակութային գործունէութեան միջազգային կոմիտէի` ՍԵԿԱ-ի տարեկան 41-րդ գիտաժողովը տեղի պիտի ունենայ Հոկտեմբեր 20-25 Երեւանի մէջ: Անիկա պիտի կրէ “Թանգարան եւ գրաւոր հաղորդակցութիւն. աւանդոյթ եւ նորարարութիւն” խորագիրը: Այս մասին, ըստ PanArmenian.net-ի, յայտնած է ՀՀ մշակոյթի նախարարի տեղակալ Արեւ Սամուէլեան:

Սամուէլեանի հաղորդմամբ` ասիկա առաջին անգամ ըլլալով կ’իրականացուի մեր տարածաշրջանին մէջ եւ ներառուած է ԵՈՒՆԵՍՔՕ-ի կողմէ Երեւանը 2012-ի գիրքի համաշխարհային մայրաքաղաք հռչակելու ձեռնարկներու շարքին:

ԻԿՕՄ/ՍԵԿԱ-ի նախագահ Էմմա Նարտի` իր հերթին նշած է, որ գիտաժողովին պիտի մասնակցի 37 երկրի շուրջ 150 մասնագէտ, 59 զեկոյցներով: Նարտի նաեւ նշած է, որ գիտաժողովը շատ կարեւոր է, այդ իսկ պատճառով անիկա պիտի հեռարձակուի նաեւ առցանց տարբերակով: Երեւանի քաղաքապետարանին մէջ տեղի պիտի ունենայ նաեւ ՍԵԿԱ-ի լաւագոյն նախագիծերուն պարգեւատրումը:

ԻԿՕՄ Հայաստանի նախագահ Մարինէ Եարոյեան նշած է, որ գիտաժողովը կը վերաբերի թանգարաններու հետ առնչուած բոլոր նիւթերուն, քանի որ անիկա առանց գիրի կարելի չէ պատկերացնել: Ըստ անոր, հայաստանեան թանգարաններու նիւթերը ժառանգութիւն մնացած են խորհրդային ժամանակներէն, եւ անոնք գիտական են: Ըստ մասնագէտին անհրաժեշտ է իւրաքանչիւր նիւթդարձնել աւելի մատչելի:

Հայաստանեան ներկայացուցիչներուն մէջ է տասը թանգարան, որոնք աւելի շատ ունին կրթական ծրագրեր: Այսպէս` Գաֆէսճէան արուեստի կեդրոնը, Յովհ. Թումանեանի, Արամ Խաչատրեանի, Պերճ Պռոշեանի տուն-թանգարանները, Զուարթնոցի թանգարանը, Էջմիածնի թանգարանը եւ այլն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button