ՀՀ Վարչապետը Հանդիպում Ունեցաւ ՄԱԿ-ի Զբօսաշրջութեան Համաշխարհային Կազմակերպութեան Գլխաւոր Քարտուղարի Հետ

ՀՀ վարչապետ Տիգրան Սարգսեան ընդունած է ՄԱԿ-ի Զբօսաշրջութեան համաշխարհային կազմակերպութեան (ԶՀԿ) գլխաւոր քարտուղար Թալիպ Ռիֆայի, որ Հայաստան ժամանած էր` մասնակցելու Հոկտեմբեր 18-19 Երեւանի մէջ տեղի ունեցող «Համամարդկային արժէքները եւ մշակութային բազմազանութիւնը 21-րդ դարուն. զբօսաշրջութեան նշանակութիւնը” խորագիրով երկօրեայ միջազգային համաժողովին: Այս մասին կը յայտնեն կառավարութեան տեղեկատւութեան եւ հասարակայնութեան հետ կապերու վարչութենէն:

Պարոն Ռիֆա շնորհակալութիւն յայտնած է ընդունելութեան համար եւ գոհունակութիւն` համաժողովի աշխատանքներուն ընթացքին առնչութեամբ: ՄԱԿ-ի ԶՀԿ-ի գլխաւոր քարտուղարը նշած է, որ տպաւորուած է մեր երկրի զբօսաշրջութեան ոլորտին յառաջընթացով: Ան ընդգծած է միջազգային համաժողովին իբրեւ արդիւնք «Երեւանեան հռչակագիր»-ի` միջմշակութային երկխօսութեան եւ մշակութային բազմազանութեան կարեւորութեան վերաբերեալ փաստաթուղթի ստորագրման կարեւորութիւնը, որ կը խրախուսէ զբօսաշրջութեան զարգացումը եւ համամարդկային արժէքներուն հանդէպ յարգանքը:

Զրուցակիցները քննարկած են մեր երկրին մէջ զբօսաշրջութեան զարգացման հեռանկարները: Վարչապետը նշած է, որ հակառակ ոլորտին մէջ արձանագրուող հինգ տոկոսանոց կայուն աճին` ՀՀ կառավարութեան առաջնահերթութիւններէն է զբօսաշրջութեան շարունակական զարգացման քաղաքականութեան իրականացումը: Կարեւոր համարուած է Հայաստանի ողջ տարածքին զանգուածային զբօսաշրջութեան զարգացման բարենպաստ միջավայրի ձեւաւորումը, տեղական զբօսաշրջութեան ներուժի իրացումը, ներդրումներու խթանումը հիւրանոցաշինութեան բնագաւառին մէջ, մատչելի հիւրանոցային ցանցի ստեղծումը, ինչպէս նաեւ միջազգային լաւագոյն փորձի ուսումնասիրութիւնը եւ կապերու հաստատումը ոլորտին մէջ յառաջատար երկիրներու հետ:
ՄԱԿ-ի ԶՀԿ-ի գլխաւոր քարտուղարը պատրաստակամութիւն յայտնած է աջակցելու Հայաստանին` վերոնշեալ հարցերու լուծման գործին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button