Տոլտ՝ Գոնկրեսի Հայկական Հարցերու Համախմբումի Փոխնախագահ

0
49

 Ամերիկայի Հայ Դատի յանձնախումբը ողջունեց այս շաբթուան ընթացքին Գոնկրեսի Հայկական հարցերու համախմբումի համանախագահ Էտ Ռոյսի կատարած այն յայտարարութիւնը, թէ Իլինոյէն գոնկրեսական Ռապըրթ Տոլտ սոյն համախմբումի փոխնախագահ նշանակուած է:
«Ջերմօրէն կ՛ողջունենք գոնկրեսական Տոլտի նշանակումը: Ամերիկահայերը մտահոգող հարցերուն մէջ Տոլտի դրական ներդրումը՝ սկսելով Հայկական Ցեղասպանութեան բանաձեւէն ու հասնելով մինչեւ Լեռնային Ղարաբաղի ինքնորոշման աջակցելու հարցերուն, զայն շատ կարեւոր դերակատար մը դարձուցած է այս համախմբումին մէջ: Մենք երախտապարտ ենք  Գոնկրեսի Հայկական հարցերու համախմբումի հիմնադիրներուն եւ ներկայ ղեկավարութեան», յայտարարած է Ամերիկայի Հայ Դատի յանձնախումբի ատենապետ Քեն Խաչիկեան:
Ռոյս իր յայտարարութեան մէջ ըսած է. «Տոլտ Հայաստանի նկատմամբ վարուած քաղաքականութեան կողմնակիցներէն եղած է: Մենք կը ջանանք Ամերիկա-Հայաստան յարաբերութիւնները սերտացնել»:
Տոլտ երախտագիտութեամբ ընդունած է այս նշանակումը՝ ընդգծելով, որ իրեն համար մեծ պատիւ է նշանակուիլ Գոնկրեսի Հայկական հարցերու համախմբումի փոխնախագահ:
Համախմբումը 1995-ին հիմնադրուած էր գոնկրեսականներ Ֆրենք Փալոնի եւ Ճան Փորթըրի կողմէ:

LEAVE A REPLY

Please enter your comment!
Please enter your name here