Արցախի Կովսական Շրջանի Մէջ Գամիշլիէն Տեղափոխուած Հայորդիներուն Թիւը Հետզհետէ Կ’աւելնայ

 Մօտ Հինգ Տարի առաջ Գամիշլիէն Արցախ՝ Կովսական տեղափոխուեցաւ բազմազաւակ Տօնապետեաններու ընտանիքը՝ Ժիրայրը, իր եօթ զաւակներուն հետ: Ան երկար տարիներ շարունակ յարմար առիթը կը փնտռէր Արցախ տեղափոխուելու համար, որովհետեւ համոզուած էր, որ ազատագրուած հողը պահպանելու համար պէտք է բնակեցնել զայն: «Իրենք իրենց արիւնը թափեցին, մենք ալ պէտք է շէնցնենք»,- ԵՌԱԳՈՅՆ-ին ըսաւ հողագործութեամբ զբաղող Ժիրայրը։

«Թիւֆէնկեան» հիմնադրամի վերաբնակեցման նախաձեռնութիւնը խրախուսեց շատ գամիշլիցիներ. անոնք յարմար առիթի կը սպասէին Արցախ տեղափոխուելու: Ժիրայրին յաջորդեցին Մհերի ընտանիքը եւ այլ երիտասարդ մը։

«Սուրիոյ մէջ տեղի ունեցող իրադարձութիւններէն ետք, Արցախ տեղափոխուելու ցանկութիւն ունեցող ընտանիքները արագ գործի անցան»,- յայտնեց երկու օր առաջ Գամիշլիէն եկած, դեռ Կովսական չհասած Վիգէն Յովսէփեանը, որ տեղափոխուած է իր չորս երեխաներուն,կնոջ եւ մօր հետ:

Այսօր Արցախի Կովսական շրջան տեղափոխուած է գամիշլիցի եօթ ընտանիք` 19 զաւակներով, ինչպէս նաեւ երեք ամուրի երիտասարդ՝ ընդհանուր առմամբ 37 շունչ։

Տեղափոխուած ընտանիքներուն տրուած է կիսակառոյց բնակարան, մշակելու հողատարածք եւ այլ հնարաւորութիւններ: Բոլոր ընտանիքները՝ բացառութեամբ Մուշեղ Արոյեանի, կը զբաղին հողագործութեամբ: “Մուշեղն ու իր տիկինը բժիշկ են, անոնք կ’աշխատին իրենց մասնագիտութեամբ”,- ըսաւ Վիգէնը։

Գամիշլիէն եւս երեք ընտանիք, որոնք ունին մէկական զաւակ, կը պատրաստուին տեղափոխուիլ Արցախ: Անոնք նոյնպէս պիտի բնակին Լաչինի կամ Կովսականի մէջ։ Այսպիսով Գամիշլիէն Արցախ տեղափոխուած հայորդիներուն թիւը պիտի հասնի 46-ի։

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>