Հոգեւոր ու Բարոյական Արժէքներու Տարածումը Հրամայական Անհրաժեշտութիւն է. Արամ Ա.-ի Խօսքը Վատիկանի Եպիսկոպոսաց Համագումարին

  Ինչպէս ծանօթ է, շուրջ շաբաթէ մը ի վեր Հռոմի Պենետիքթոս 16-րդ Սրբազան Քահանայապետին հրաւէրով ու նախագահութեամբ Վաիկանի մէջ տեղի կ’ունենայ Եպիսկոպոսաց համագումար “Նոր Աւետարանչութիւն՝ ի խնդիր քրիստոնէական հաւատքի տարածման” բնաբանով: Այս մասին կը հաղորդէ Մեծի Տանն Կիլիկիոյ կապողիկոսութիւնը:

Յիշեալ համագումարին ուղղած իր պատգամին մէջ Վեհափառ Հայրապետը անդրադառնալով աւետարանչութեան նոր մղում տալու անհրաժեշտութեան, կ’ըսէ,- “Աւետարանչութիւնը, այլ խօսքով քրիստոնէական արժէքներու ու սկզբունքներու տարածումը, եկեղեցւոյ գոյութեան պատճառն է: Անիկա Քրիստոսի կողմէ տրուած պատուէր է եկեղեցւոյ: Անհրաժեշտ է ընդառաջել այդ պատուէրին, յատկապէս հոգեւոր ու բարոյական արժէքներու անկում ապրող ներկայ ընկերութեան կեանքին մէջ, վերանորոգելով եկեղեցւոյ յանձնառութիւնը՝ ի խնդիր քրիստոնէական առաքելութեան ու աւետարանչութեան առաւել ազդու կենսագործման: Սա մեծագոյն հրամայականն է այսօր եկեղեցւոյ դիմաց”,- կը հաստատէ Վեհափառ Հայրապետը: Ապա կ’աւելցնէ,- “Եկեղեցւոյ աւետարանչական կոչումին հզօրացումը միայն կաթոլիկ եկեղեցւոյ առնչուած խնդիր չէ. անիկա համաքրիստոնէական առաջնահերթութիւն է: Բոլոր եկեղեցիները կոչուած են, իւրաքանչիւրը տեղական պայմաններուն համապատասխան մօտեցումով, յատուկ կարեւորութիւն ընծայելու հոգեւոր ու բարոյական արժէքներու տարածման: Սա դիւրին առաքելութիւն մը չէ, Համաշխարհայնացման ժխտական ուժերով լեցուն ներկայ աշխարհին մէջ: Սակայն հակառակ այս իրողութեան եկեղեցին պէտք է հաւատարիմ մնայ իր կոչումին”:

Վեհափառ Հայրապետը իր պատգամի աւարտին կ’ողջունէ Պենետիքթոս 16-րդ Պապին նախաձեռնութիւնը, իր շնորհակալութիւնը կը յայտնէ Մեծի Տանն Կիլիկիոյ Կաթողիկոսութեան ուղղած իր հրաւէրին համար յիշեցնելով, որ եկեղեցիներ առաւելագոյն չափով պէտք է գործակցին իրենց առաքելութեան ու աւետարանչութեան ճամբուն վրայ:

Վեհափառ Հայրապետին պատգամը համագումարին կարդաց Մեծի Տանն Կիլիկիոյ Կաթողիկոսութեան ներկայացուցիչ Հոգշ. Տ. Մասիս վրդ. Զօպույեան, ներկայութեամբ Պենետիքթոս 16-րդ Պապին: Յայտնենք, որ հայր սուրբը նաեւ Պապին ներկայացուց Վեհափառ Հայրապետին եղբայրական ողջոյնները:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>