Արամ Ա. Կաթողիկոս Ընդունեց Ֆրանսայի Բողոքական Եկեղեցիներու Միութեան Նախագահը

Այսօր` 20 Հոկտեմբեր 2012-ի առաւօտուն, Ն.Ս.Օ.Տ.Տ Արամ Ա. Վեհափառ Հայրապետը Վեհարանին մէջ ընդունեց Ֆրանսայի Բողոքական Եկեղեցիներու Նախագահ Փասթէօր Իվ Կունէլը, ընկերակցութեամբ Վեր. Փիեռ Լագոստի եւ Վեր. Ռոպեր Սարգիսեանի: Հանդիպումը առիթ մը եղաւ ընդհանուր քննարկումի ենթարկելու Միջին Արեւելքէն ներս տիրող ներկայ կացութիւնը, յատկապէս քրիստոնեայ համայնքներու դիմագրաւած մարտահրաւէրները: Յայտնենք, որ Ֆրանսայի Բողոքական եկեղեցիները պատմական կապեր ունին շրջանին հետ:

Վեհափառ Հայրապետը ընդհանուր արժեւորում մը կատարելով ներկայ կացութեան, շեշտեց որ արեւմտեան երկիրներուն կողմէ ճիշդ չէ հապճեպ եզրակացութիւններու հանգիլ եւ խիստ դիրքորոշումներ որդեգրել: Անհրաժեշտ է մօտէն հետեւիլ տեղի ունեցող զարգացումներուն, միշտ կառչելով մարդկային իրաւունքներու, արդարութեան ու խաղաղութեան սկզբունքներուն: Այս ծիրէն ներս Վեհափառը յատուկ կարեւորութեամբ անդրադարձաւ քրիստոնեայ-իսլամ համակեցութիւնը աւելի ամրապնդելու անհրաժեշտութեան, յիշեցնելով որ քրիստոնեայ համայնքները կը պատկանին Միջին Արեւելքին, որպէս ծննդավայր քրիստոնէութեան, եւ կը մնան ամրօրէն կառչած իրենց պատմական իրաւունքներուն ու առաքելութեան:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button