Ֆրանսուա Հոլանտի Աջակցութեամբ Փարիզի Մէջ Պիտի Բացուի Հայոց Ցեղասպանութեան Յիշողութեան Կեդրոն

Հայոց Ցեղասպանութեան 100ամեակին ընդառաջ Ֆրանսայի մայրաքաղաք Փարիզի մէջ պիտի հիմնուի Հայոց Ցեղասպանութեան Յիշողութեան կեդրոն: Նախաձեռնութիւնը ՀՅԴ Հայ Դատի յանձնախումբինն է՝ Ֆրանսայի նախագահ Ֆրանսուա Հոլանտի աջակցութեամբ:
«Ֆրանսուա Հոլանտ այս ծրագիրի մղիչ ուժն է: Ան կը ցանկանայ, որ այս նախաձեռնութիւնը իրականութիւն դառնայ: Երբ համայնքի անդամները 2012ին հանդիպեցան Ֆրանսայի նախագահին, այս հարցը նոյնպէս քննարկուեցաւ, եւ ան հաստատեց ծրագիրը: Այս տարիներուն ընթացքին ան միշտ կը հետաքրքրուի, թէ ծրագիրը ո՞ր փուլին մէջ է: Ան յանձնարարած է Փարիզի քաղաքապետարանին աջակցիլ այս հարցով եւ տարածք տրամադրել այս կեդրոնին համար: Փաստօրէն, պետութեան ուժերը մէկտեղուած են, որպէսզի այս կեդրոնի ծրագիրը կեանքի կոչուի», ըստ «Արմէնփրէս»ի՝ ըսած է ՀՅԴ Բիւրոյի անդամ Մուրատ Փափազեան՝ աւելցնելով, որ այժմ կողմերը համապատասխան կառոյց կը փնտռեն: Պայմանաւորուածութեան համաձայն՝ Փարիզի քաղաքապետարանը շէնք պիտի տրամադրէ հայ համայնքին՝ կեդրոնի բացման համար, սակայն կառոյցը պիտի պատկանի ոչ թէ համայնքին, այլ՝ քաղաքապետարանին:
Մուրատ Փափազեան շեշտած է, որ Յիշողութեան կեդրոնի նախաձեռնութիւնը ամենայն հաւանականութեամբ իրականութիւն պիտի դառնայ աշնան: Յիշողութեան կեդրոնին մէջ պիտի գործեն ցուցասրահ, աշխատասենեակներ, ուր ուսանողները պիտի կարենան ուսումնասիրութիւններ կատարել, նաեւ դահլիճ, ուր պիտի կազմակերպուին գիտաժողովներ, դասախօսութիւններ, հանդիպումներ Հայ Դատի յանձնախումբի եւ հայ համայնքի ներկայացուցիչներու հետ:
Թէեւ Յիշողութեան կեդրոնը նուիրուած պիտի ըլլայ Հայոց Ցեղապանութեան, սակայն կը նախատեսուի, որ ձեռնարկներ եւ դասախօսութիւններ կազմակերպեն մարդկութեան դէմ գործուած այլ յանցագործութիւններու մասին:
Բացի Յիշողութեան կեդրոնի բացումէն, Ֆրանսայի մէջ 100ամեակին նուիրուած ծրագիրները բազմաթիւ են: Մարտին, Սորպոն համալսարանին մէջ պիտի կայանայ չորսօրեայ միջազգային գիտաժողով: Հայոց Ցեղասպանութեան թանգարան-հիմնարկին հետ համատեղ երեք ամիս շարունակ Փարիզի քաղաքապետարանին մէջ պիտի ցուցադրուին թանգարանի ցուցանմուշները:
«Կան հարիւրաւոր այլ ձեռնարկներ. ցուցահանդէսներ, գիրքերու հրատարակում: Բազմաթիւ պատ-կերասփիւռի ընկերութիւններու հետ պայմանաւորուածութիւն կայ Հայոց Ցեղասպանութեան մասին շարժպատկերներ ցուցադրելու առնչութեամբ: Պայմանաւորուածութիւններ ձեռք բերուած են, որպէսզի Ֆրանսայի ամենամեծ լրատուամիջոցները ոչ միայն լուսաբանեն այդ ձեռնարկները, այլեւ առանձին յօդուածներով անդրադառնան Հայոց Ցեղասպանութեան տարելիցին», ըսած է Մուրատ Փափազեան՝ աւելցնելով, որ 100ամեակի ոգեկոչումը պէտք է ծառայեցնել ի նպաստ Հայոց Ցեղասպանութեան ճանաչման եւ հատուցման:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button