Արցախի Հակամարտութեան Լուծումը Ուաշինկթընի Առաջնահերթութիւններէն Է

0
59

Յառաջիկայ չորս տարիներուն ընթացքին, Միացեալ Նահանգներու վարչակազմի առաջնահերթութիւններէն մէկը պիտի ըլլայ Լեռնային Ղարաբաղի հակամարտութեան խաղաղ կարգաւորում ապահովելը. այսպէս յայտարարած է Միացեալ Նահանգներու արտաքին գործոց նախարարի Եւրոպայի եւ Եւրասիոյ հարցերով օգնական Էրիք Ռուպըն՝ «Ամերիկա-ատրպէյճանական դաշինք»ին կողմէ Ուաշինկթընի մէջ կազմակերպուած «Պաքուի բարեկամներու գիշեր» ձեռնարկին ընթացքին:
Ըստ ատրպէյճանական «contact.az» լրատուական կայքին, «Ամերիկա-ատրպէյճանական դաշինք»ը հիմնադրուած է այս տարի եւ զայն կը ղեկավարէ Ատրպէյճանի փոխադրական հարցերու նախարար Զիա Մամետովի որդին՝ Անար Մամետովը:
Նոյն կայքը կը գրէ, թէ վերջերս սովորութեան վերածուած է այս կամ այլ ղեկավարի զաւակին կողմէ արտասահմանի մէջ հաստատումը նման մարմիններու՝ Ատրպէյճանի վարկանիշը բարձրացնելու խոստումներով, որոնք սակայն կը վերափոխուին քարիւղի հարստութենէն ապահովուած գումարները «լուալու» համար շահագործուող կառոյցներու: «Նման արշաւներ կը հակասեն ազգային շահերուն եւ կը ծառայեն միայն մէկ ընտանիքի», «Թուրան» լրատուական գործակալութեան թղթակիցին հետ զրոյցի մը ընթացքին ըսած է նախապէս Ատրպէյճանի համար լոպիական աշխատանք տարած պաշտօնատար մը՝ առանց ինքնութիւնը բացայայտելու

LEAVE A REPLY

Please enter your comment!
Please enter your name here