«Հայաստան» Հիմնադրամի Եռօրեայ Հեռախօսամարաթոնը Սկսաւ

0
53

«Հայաստան» Համահայկական Հիմնադրամի համաեւրոպական հեռախօսամարաթոնը հիմնադրամի երկրորդ մեծագոյն դրամահաւաքն է, որ այս տարի տեղի պիտի ունենայ 15-18 Նոյեմբերիին: Հայ եւ օտար աւելի քան 700 կամաւորներ՝ Ֆրանսայէն, Գերմանիայէն, Զուիցերիայէն, Պելճիքայէն արդէն իսկ լծուած են աշխատանքի. արդարեւ, անոնք Ֆրանսայի հինգ քաղաքներէն՝ Փարիզ, Լիոն, Մարսէյ, Նիս եւ Թուլուզ, կը հեռաձայնեն հայ ընտանիքներու եւ կազմակերպութիւններու՝ առաջարկելով իրենց նուիրատուութիւններով մասնակցիլ Հայաստանի ու Արցախի վերաշինութեան նպատակով կատարուող դրամահաւաքին: Հիմնադրամին կողմէ «Արմենփրէս»ին յայտնած են, որ Ֆրանսայէն դուրս այդ նախաձեռնութեան պիտի միանան Հոլանտան, Յունաստանը, Շուէտը, իսկ Եւրոպայէն դուր՝ Արժանթինն ու Պրազիլը։
Հեռախօսամարաթոնի նուիրատուութիւնները պիտի տրամադրուին Արցախի գիւղերուն մէջ համայնքային կեդրոններու կառուցման, Հայաստանի Տաւուշի մարզին մէջ գիւղատնտեսութեան զարգացման ծրագիրներուն եւ սուրիահայութեան հրատապ խնդիրներու լուծման:
Իբրեւ հանգանակութեան կնքահայրեր, որոնք հայրենաշինութեան մասնակցելու կոչով կը դիմեն հանրութեան՝ հանդէս պիտի գան Ֆրանսայի ազգային հաւաքականի ֆութպոլիստ, աշխարհի ախոյեան Եուրի Ճորքայէֆը եւ «Ֆրանս» պատկերասփիւռի ընկերութեան մարզական ծրագիրներու տնօրէն Տանիէլ Պիլալեանը:
Եւրոպայի մէջ նման հեռախօսամարաթոններ տեղի կ՛ունենան 2000 թուականէն ի վեր: Համաեւրոպական հեռախօսամարաթոնի պատմութեան ընթացքին ընդհանուր առմամբ 20.800 նուիրատուի կողմէ կատարուած է շուրջ 10 միլիոն եուրօ նուիրատուութիւն:
«Հայաստան» Հիմնադրամի տարեկան հիմնական նախաձեռնութիւնը՝ հեռուստամարաթոնը, այս տարի եւս տեղի պիտի ունենայ Գոհաբանութեան տօնի օրը՝ Նոյեմբերի 22-ին, եւ պիտի կրէ «Մեր գիւղը» խորագիրը։

 

LEAVE A REPLY

Please enter your comment!
Please enter your name here