Հայ Աւանդական Կուսակցութիւնները Պատրաստակամ են Օժանդակելու Արցախի Զարգացման Ծրագրերուն

0
22

Հայ աւանդական կուսակցութիւններու պատասխանատուները կոչ ուղղած են համախոհներուն` «Հեռուստամարաթոն-2012»-ին մասնակցելու ուղերձով եւ հաւաստիացուցած են Արցախի զարգացման ծրագրերուն օժանդակելու իրենց պատրաստակամութեան մասին: Հայ աւանդական կուսակցութիւններու պատասխանատուները այս մասին յայտնած են ԼՂՀ Ազգային ժողովի նախագահ Աշոտ Ղուլեանի հետ Լոս Անճելըսի մէջ հանդիպման ժամանակ: Այս մասին կը հաղորդէ ԼՂՀ ԱԺ մամուլի ծառայութիւնը:

ԼՂՀ Ազգային ժողովի նախագահ Աշոտ Ղուլեան Նոյեմբեր 17-ին Լոս Անճելըսի մէջ հանդիպում ունեցած է Սոցիալ-դեմոկրատական Հնչակեան կուսակցութեան Արեւմտեան Ամերիկայի վարչական մարմնի անդամներուն հետ` ատենապետ Վազգէն Խոտանեանի գլխաւորութեամբ: Յաջորդ հանդիպումը տեղի ունեցած է Ռամկավար Ազատական կուսակցութեան Արեւմտեան Ամերիկայի շրջանային վարչութեան պատասխանատուներուն հետ` ատենապետ Յակոբ Նազարեանի գլխաւորութեամբ: Արցախի խորհրդարանի նախագահը հանդիպում ունեցած է նաեւ ՀՅԴ Արեւմտեան Ամերիկայի Կեդրոնական կոմիտէի պատասխանատուներուն հետ` Վիգէն Յովսէփեանի գլխաւորութեամբ:

Աւանդական կուսակցութիւններու ներկայացուցիչներուն հետ քննարկուած են Արցախի Հանրապետութեան ներկայ հասարակական-տնտեսական իրավիճակը, տարածաշրջանային վերջին զարգացումները եւ Արցախ-Սփիւռք համագործակցութեան հեռանկարին վերաբերող հարցեր:

Հանդիպումներուն մասնակցած են Հայ Առաքելական Եկեղեցւոյ Արցախի թեմի առաջնորդ Պարգեւ արքեպիսկոպոս Մարտիրոսեան, ԱՄՆ-ի եւ Քանատայի մէջ ԼՂՀ մշտական ներկայացուցիչ Ռոպերթ Աւետիսեան եւ ԼՂՀ ԱԳՆ բազմակողմ յարաբերութիւններու վարչութեան պետ Արմինէ Ալեքսանեան:

Օրուան երկրորդ կիսուն ԼՂՀ Ազգային ժողովի նախագահը հանդիպում ունեցած է բարերար Անթօ Պաղտասարեանի հետ: Զրոյցի ընթացքին քննարկուած են յառաջիկայ հեռուստամարաթօնի ուղղուածութեան, ինչպէս նաեւ Արցախի տնտեսական զարգացման հետ առնչուող հարցեր: Հանդիպման մասնակցած են նաեւ «Հայաստան» Համահայկական հիմնադրամի գործադիր տնօրէն Արա Վարդանեան եւ կազմակերպութեան ԱՄՆ Արեւմտեան ափի գործադիր տնօրէն Սարգիս Քոթանճեան:

LEAVE A REPLY

Please enter your comment!
Please enter your name here