Յաջորդ Տարի Շէնկենեան Երկիրներ Մուտքի Արտօնագիրը Աւելի Աժան Պիտի Ըլլայ

0
16

 Յունուար 2013-ին Հայաստանի եւ Եւրոպական Միութեան միջեւ պիտի ստորագրուի վիզային վարչակարգը մեղմացնող համաձայնագիր, որուն կէտերը արդէն քննարկուած են: Այդ մասին այսօր լրագրողներուն համար նախատեսուած «Եւրոպական հարեւանութեան տարածաշրջանային տեղեկատուութեան եւ հաղորդակցման 2011-2013թթ. ծրագիր»-ի ծիրէն ներս յայտարարած է Հայաստանի մէջ եւրոպական պատուիրակութեան քաղաքական հարցերու բաժնի ղեկավար Օննօ Սիմոնս (Onno Simons): Այս մասին կը տեղեկացնէ panorama.am կայքը:

«Եւրոպական Միութիւնը կը խրախուսէ Հայաստանի եւ Եւրոպայի միջեւ կապերու ուժեղացումը», -աւելցուցած էՍիմոնս: Ըստ անոր՝ շէնկենեան երկիրներ մեկնելու վիզային գինը 60 եուրոյէն պիտի իջնէ 30 եուրոյի: Աւելին, որոշ խումբերու համար վիզան պիտի ըլլայ անվճար, իսկ մուտքի թոյլտուութեան ստացման գործընթացը աւելի դիւրին պիտի ըլլայ:

Բացի այդ, համաձայնագրի ստորագրումը անոր խօսքով, բաւական պիտի դիւրացնէ նաեւ հայկական արտադրանքի արտահանումը Եւրոպա: Բայց արտադրանքը պէտք է համապատասխանէ եւրոպական չափանիշներուն: «Հայաստանի մէջ համապատասխան քննութենէ ետք արտադրանքի համար «կանաչ լոյս» կը վառի Եւրոպայի մէջ»,- նկատեց դիւանագէտը` միեւնոյն ժամանակ նշելով, որ արտադրողները ստիպուած պիտի ըլլան բարձրացնել իրենց արտադրանքին որակը, ինչ որ նաեւ մեծ օգուտ է սեփական երկրի քաղաքացիներուն համար:

 

 

LEAVE A REPLY

Please enter your comment!
Please enter your name here