ՔուԷյթի Իշխանը Ընդունած է Հայաստան Այցելելու ՀՀ Նախագահի Հրաւէրը

0
32

 ՀՀ արտաքին գործոց նախարար Էտուարտ Նալպանտեան Նոյեմբեր 19-ին պաշտօնական այց կատարած է Քուէյթի պետութիւն: Երէկ Առաւօտեան ԱԳ նախարարը ընդունած է Քուէյթի Իշխան Շէյխ Սապահ Ալ Ահմէտ Ալ Ճապեր Ալ Սապահը: Շնորհակալութիւն յայտնելով ընդունելութեան համար` ՀՀ ԱԳ նախարարը Քուէյթի ղեկավարին փոխանցած է Հայաստանի նախագահ Սերժ Սարգսեանի ողջիւններն ու բարեմաղթանքները եւ ՀՀ նախագահի անունով վերահաստատած Իշխանին ուղղուած Հայաստան այցելելու հրաւէրը: Իշխան Շէյխ Սապահ Ալ Ահմէտ Ալ Ճապեր Ալ Սապահ խնդրած է ՀՀ նախագահ Սերժ Սարգսեանին փոխանցել իր ամենաջերմ մաղթանքները եւ տեղեկացուցած, որ սիրով կ’ընդունի Հայաստան այցելելու հրաւէրը:

Հանդիպման ընթացքին քննարկուած են 2009-ին ՀՀ նախագահի Քուէյթ կատարած պետական այցելութեան ծիրէն ներս ձեռք բերուած համաձայնութիւններու կատարման ընթացքը: Գոհունակութեամբ նշուած է, որ Քուէյթի եւ Երեւանի մէջ բացուած են երկու երկիրներու դեսպանատուները, կը գործէ միջկառավարական յանձանաժողովը:

Քուէյթի ղեկավարը դրուատանքի խօսքեր ըսած է երկրին մէջ ապրող հայերու հասցէին` ընդգծելով, որ անոնք իրենց գործունէութեամբ կը նպաստեն Քուէյթի բարգաւաճման: Էտուարտ Նալպանտեան երախտագիտութիւն յայտնած է հայ համայնքի նկատմամբ Քուէյթի իշխանութիւններուն կողմէ դրսեւորուող ջերմ ու հոգատար վերաբերմունքին եւ Քուէյթի մէջ հայկական եկեղեցւոյ կառուցման հարցով իշխանութիւններու աջակցութեան համար:

Քուէյթի Իշխանը եւ  Հայաստանի արտաքին գործոց նախարարը մտքեր փոխանակած են  նաեւ միջինարեւելեան զարգացումներուն վերաբերեալ:

ԱԳ նախարար Էտուարտ Նալպանտեանի եւ Քուէյթի վարչապետ Շէյխ Ճապեր Ալ Մուպարաք Ալ Ահմատ Ալ Սապահի հետ հանդիպման ընթացքին հանգամանալից քննարկուած են երկկողմ առեւտրատնտեսական համագործակցութեան խթանման նպատակով ձեռնարկուող քայլերը:

Քուէյթի վարչապետն ու Հայաստանի ԱԳ նախարարը անդրադարձած են միջկառավարական յանձնաժողովի երկրորդ նիստի նախապատրաստական աշխատանքներուն, մտքեր փոխանակած գործարար համաժողով կազմակերպելու հնարաւորութեան շուրջ: Վարչապետ Ալ Ահմատ Ալ Սապահի յայտնած է, որ կառավարութեան յառաջիկայ նիստին համապատասխան յանձնարարականներ պիտի տրուին պատասխանատու գերատեսչութիւններու ղեկավարներուն:

LEAVE A REPLY

Please enter your comment!
Please enter your name here