Պոլսոյ Հայկական «Ժամանակ» Օրաթերթի Մասին Վաւերագրական Շարժանկար Պիտի Նկարահանուի

0
25

Պոլսոյ հայկական «Ժամանակ» օրաթերթը կը շարունակէ յոբելինական ձեռնարկներ կազմակերպել աշխարհի ամենատարբեր ծայրերը: Պոլսոյ հայկական «Ժամանակ» օրաթերթի գլխաւոր խմբագիր Արա Գոչունեան, Armenpress.am-ի հետ զրոյցի մը ընթացքին նշած է, թէ պարբերականի յոբելեանը կը նշուի 2008-էն ի վեր, իսկ յաջորդ տարի` 2013-ին, պիտի նշուի թերթի հիմնադիրին` Միսաք Գոչունեանի ծննդեան 150-ամեակը, եւ այդպիսով պիտի եզրափակուի յոբելինական ձեռնարկներու շարքը: «Թերթը Սթամպուլի մէջ լոյս կը տեսնէ 1908-էն ի վեր եւ դեռ հայ աշխարհի ամենահին օրաթերթն է, որ առանց ընդհատումներու կը շարունակէ տպագրուիլ»,- ընդգծած է Արա Գոչունեան:

Ձեռնարկները տեղի կ’ունենան աշխարհի տարբեր քաղաքներու մէջ: Երեւանի մէջ   յոբելեանի ծիրէն ներս իրականացած է Միսաք Գոչունեանի «Կրակին մէջէն» գիրքին շնորհանդէսը, ինչպէս նաեւ աշխարհահռչակ սթամպուլահայ լուսանկարիչ Արա Կիւլերի հայաստանեան թեմաթիքայով աշխատանքներուն ցուցահանդէսը:
Իսկ յաջորդ տարուան համար կան այլ ծրագրեր: Թէեւ ծրագրերը այժմ կը գտնուին նախապատրաստական փուլի մէջ, այնուամենայնիւ, Գոչունեանի տեղեկացմամբ, կը նախատեսուի Պոլսոյ մէջ սիմփոզիում կազմակերպել, ինչպէս նաեւ վաւերագրական շարժանկար նկարահանել` թերթի պատմութեան վերաբերեալ:

Թերթի հիմնադիրի ծննդեան 150-ամեակին ծիրէն ներս պիտի կատարուի ոգեկոչման արարողութիւն եւ շիրիմի նորոգութիւն:

LEAVE A REPLY

Please enter your comment!
Please enter your name here