Վերջին Երկու Տարիներուն Հայաստանի Մէջ Ծնունդներու Թիւը Նուազած Է

0
44

Վերջին երկու տարիներուն Հայաստանի մէջ կը նկատուի ծնունդներու թուաքանակի նուազում: Այդ մասին՝ ըստ news.am-ի՝ այսօր` Նոյեմբեր 20-ին, լրագրողներու հետ հանդիպման ժամանակ ըսած է ՀՀ աշխատանքի եւ ընկերային հարցերու նախարարութեան ժողովրդագրութեան բաժնի պետ Վանիկ Պապաջանեանը:

Ասիկա այն բանէն ետք, երբ 2001-2010 թուականներուն Հայաստանի մէջ նկատուած է ամուսնութիւններու եւ ծնունդներու աճ: Մասնաւորապէս` ծնունդներու աճը կազմած է մօտ 20%` 2010-ին. հասնելով 44 հազարի: Ծնունդներու աճը այդ ժամանակահատուածին Վ. Պապաջանեանը բացատրեց սեռատարիքային համամասնութիւններու փոփութեամբ` ամուսնութեան տարիքի մարդոց թիւը աւելցած է: Սակայն սեռատարիքային բուրգի ուսումնասիրութիւնը ցոյց կու տայ, որ 2015-էն ետք ծնունդներու թիւը կը նուազի, քանի որ կարողական ամուսնացողները 90-ական թուականներուն ծնածներն են:

ՄԱԿ-ի բնակչութեան հիմնադրամի հայաստանեան գրասենեակի ներկայացուցիչ Գարիկ Հայրապետեան ըսած է, որ ծերացող ազգ ենք, որ կ’ազդէ ժողովրդագրական իրավիճակին վրայ: Տնտեսութեան կառուցուածքը նոյնպէս կը փոխուի` պէտք է աւելի շատ ներդրումներ ընել առողջապահութեան, ընկերային ապահովութեան բնագաւառին մէջ:

Ընկերաբան Կարէն Սարգսեան նշած է, որ ոչ թէ ծերացող ազգ ենք, այլ Հայաստանի բնակչութիւնը կը ծերանայ, քանի որ երիտասարդութիւնը կը ցանկանայ լքել Հայաստանը: Ըստ ընկերաբանին՝ գաղթականներու կառուցուածքին մէջ տեղի կ’ունենան որակական փոփոխութիւն` հիմնականօրնէ կ’երթան բարձր որակաւորում ունեցողները, երբ նախապէս կը հեռանային առաւելապէս միջին մասնագիտական կրթութիւն ունեցողները:

LEAVE A REPLY

Please enter your comment!
Please enter your name here