Թուրք-Սուրիական Սահմանին ՆԱԹՕ-ի Հրթիռներ Տեղակայելու Հարցը Լուծուած Է. Էրտողան

0
43

Սուրիոյ հետ Թուրքիոյ սահմանին ՆԱԹՕ-ի Patriot տեսակի հրթիռներ տեղակայելու հարցը լուծուած է: Ատիկա կրնայ կատարուիլ որեւէ ատեն: Այս մասին կը հաղորդէ «Արմենփրէս»-ը վկայակոչելով «Անատոլու» լրատուական գործակալութիւնը: Այս մասին լրագրողներուն ըսած է Թուրքիոյ վարչապետ Ռեճէպ Թայիպ Էրտողան: «Այդ հարցով աշխատանքներ տարինք եւ հասանք վերջնակէտին: Ատիկա կրնայ կատարուիլ որեւէ ատեն», -Եգիպտոսէն վերադարձին ըսած է Էրտողան: Ան նաեւ աւելցուցած է, որ Սուրիոյ հարցով մօտ ատենէ կ’այցելէ Ուաշինկթըն` ԱՄՆ նախագահ Պարաք Օպամայի հետ «դէմ յանդիման» հանդիպելու համար:

Թուրքիոյ մէջ ՆԱԹՕ-ի Patriot-ներ տեղակայուելու մասին լուրը հաստատած է նաեւ Թուրքիոյ արտաքին գործոց նախարար Ահմէտ Տաւուտօղլու: «Թուրք-սուրիական սահմանին տեղակայուելիք հրթիռները Սուրիայէն հնարաւոր յարձակումներէն պաշտպանողական նպատակ կը հետապնդեն: Այդ գործընթացը պաշտօնապէս կ’աւարտի կարճ ժամանակի մէջ», -ըսած է ան:

Թուրքիոյ ԱԳ նախարարը աւելցուցած է, որ ինք Կազա կը մեկնի «համերաշխութեան նպատակով» եւ երկկողմանի յարձակումները դադրեցնելու համար «շփումներու մէջ կը գտնուին բոլոր կողմերուն հետ»: «Գլխաւոր նպատակը Կազայի մէջ հրադադարի ապահովումն է», -ըսած է Տաւուտօղլու:

 

LEAVE A REPLY

Please enter your comment!
Please enter your name here