Արցախի Խորհրդարանի Խօսնակը Գնահատելի Կը Համարէ Ամերիկահայերու Դերը ԼՂՀ Զարգացման Աջակցելու Գործին Մէջ

0
19

«Հայաստան» համահայկական հիմնադրամի ամենամեայ հեռուստամարաթօնի նախապատրաստման աշխատանքներուն ծիրէն ներս` կը շարունակուի ԼՂՀ պատուիրակութեան այցը Ամերիկայի Միացեալ Նահանգներ: Այս մասին կը հաղորդեն ԼՂՀ ազգային ժողովի մամուլի ծառայութենէն:

ԼՂՀ պատուիրակութիւնը Նոյեմբեր 20-ին այցելած է Հայ Առաքելական եկեղեցւոյ Հիւսիսային Ամերիկայի Արեւմտեան թեմի առաջնորդարան եւ հանդիպում ունեցած թեմակալ առաջնորդ Յովնան արքեպիսկոպոս Տէրտէրեանի, թեմական խորհուրդի անդամներու հետ: Ողջունելով Արցախի պատուիրակութիւնը, Յովնան սրբազան հաւաստիացուցած է յառաջիկայ հեռուստամարաթօնին ԱՄՆ Արեւմտեան ափի հայութեան մասնակցութիւնը:

Ըստ karabakh-open.info-ի` օրուան երկրորդ կիսուն ԼՂՀ Ազգային ժողովի նախագահ Աշոտ Ղուլեան ընդունած է բարերար Իսահակ Վարդանեանը: Հանդիպման ընթացքին քննարկուած են Արցախի մէջ հասարակական ծրագրերու հեռանկարներուն վերաբերող հարցեր:

 

Յաջորդ հանդիպումը կայացած է Շուշիի մէջ տարբեր ծրագրեր իրականացնող ամերիկահայ բարերարներու հետ` Ալեք Պաղտասարեանի գլխաւորութեամբ: Զրոյցի ընթացքին քննարկուած են Շուշիի մէջ նոր ծրագրեր իրականացնելու գաղափարներ եւ սպասուող հեռուստամարաթօնին ներկայացուած ծրագրի որոշ մանրամասներ:

Նոյն օրը երեկոյեան կայացած է ԼՂՀ պատուիրակութեան հանդիպումը Ամերիկայի հայկական համագումարի ԱՄՆ Արեւմտեան ափի գրասենեակի պատասխանատուներու հետ: Զրոյցի ընթացքին քննարկուած են ԼՂՀ ներքին եւ արտաքին քաղաքականութեան առնչուող հարցեր, ինչպէս նաեւ տարածաշրջանային կարեւորութիւն ներկայացնող խնդիրներ: Աշոտ Ղուլեան կարեւոր համարած է Ամերիկայի հայկական համագումարի դերակատարութիւնը Արցախի շահերը ԱՄՆ-ի մէջ պաշտպանելու գործին մէջ:

 

Արցախի հանրապետութեան պատուիրակութիւնը նաեւ այցելած է Լոս Անճելըսի ՀՀ հիւպատոսութիւն, հանդիպում ունեցած գլխաւոր հիւպատոս Գրիգոր Յովհաննիսեանի եւ անձնակազմի հետ:

 

Օրուան աւարտին բարերարներ Յակոբ եւ Հիլտա Պաղտասարեաններու տան մէջ տեղի ունեցած է ընդունելութիւն Արցախի պատուիրակութեան պատուին, որուն ներկայ եղա են տեղի հայկական համայնքի ներկայացուցիչները:

 

Հանդէս գալով ընդունելութեան ընթացքին` Ազգային ժողովի նախագահը գնահատած է Ամերիկայի մեր հայրենակիցներուն դերը Արցախին սատարելու գործին մէջ եւ անոնց կոչ ուղղած է շարունակելու ազգանուէր գործունէութիւնը յանուն հայրենիքի զօրացման:

LEAVE A REPLY

Please enter your comment!
Please enter your name here