Կազայի Մէջ Զինադադար Հաստատելու Փորձեր

0
32

Կազան շարունակուեցաւ ծանրօրէն ռմբակոծուիլ իսրայէլեան ծովուժին, հրետանիին եւ օդուժին կողմէ, մինչ զինադադար հաստատելու միջնորդական ջանքերը կը շարունակուէին՝ Եգիպտոսի գլխաւորութեամբ:
Իսրայէլեան ռմբակոծումներուն հետեւանքով, Երեքշաբթի օր պաղեստինեան «Համաս» շարժումի ղեկավար մը եւս սպաննուեցաւ, ինչպէս նաեւ՝ տասէ աւելի քաղաքայիններ՝ ցարդ սպաննուած պաղեստինցիներուն թիւը հասցնելով 120-ի: Երեքշաբթի օրուան զոհերուն մէջ կային նաեւ երկու լրագրողներ:
Իսրայէլեան բանակը հաղորդեց, թէ Երեքշաբթի օր Իսրայէլի դէմ արձակուած են 60 հրթիռներ, իսկ իսրայէլեան պատկերասփիւռի 2-րդ կայանը հաղորդեց, թէ Աշքոլ շրջանը հարուածած հրթիռի մը պատճառով, իսրայէլացի մը ծանրօրէն վիրաւորուած է:
Միջնորդական ջանքերը նոր թափ ստացան Երեքշաբթի օր, երբ Գամպոտիա այցելող Միացեալ Նահանգներու նախագահ Պարաք Օպամա որոշեց իրեն ընկերակցող արտաքին գործոց նախարար Հիլարի Գլինթընը շրջան ղրկել՝ հանդիպումներ ունենալու համար իսրայէլացի, պաղեստինցի եւ եգիպտացի ղեկավարներու հետ:
Երեքշաբթի օր Գահիրէ ու Երուսաղէմ այցելեց նաեւ ՄԱԿ-ի ընդհանուր քարտուղար Պան Քի Մուն՝ փոխադարձ ռմբակոծումները կասեցնելու կոչ կատարելով: Ան ազդարարեց, թէ Կազայի դէմ իսրայէլեան ցամաքային որեւէ գործողութիւն շրջանին մէջ վտանգաւոր հետեւանքներ պիտի ունենայ:
Երեքշաբթի յետմիջօրէին, եգիպտական եւ պաղեստինեան աղբիւրներ հաղորդեցին, թէ Կազայի մէջ զինադադար հաստատելու ջանքերը յաջողութեան սեմին կը գտնուին, եւ հաւանական է, որ կողմերը ռմբակոծումները դադրեցնեն Չորեքշաբթի օր:
Մինչ իսրայէլեան կառավարութեան աղբիւրները կը յայտնէին, թէ զինադադարի համաձայնութիւնը չէ վերջնականացած՝ իսրայէլեան պատկերասփիւռի 2-րդ կայանը հաղորդեց, որ զինադադարի համաձայնութիւնը արդէն ստորագրուած է եւ պիտի սկսի գործադրուելու Չորեքշաբթի օր:
Իսրայէլի կառավարութենէն 9 նախարարներէ կազմուած մարմինը, Երեքշաբթի օր գումարեց արտակարգ նիստ մը, որուն աւարտին յայտարարուեցաւ, թէ Եգիպտոսի միջնորդութեամբ դիւանագիտական բանակցութեանց յաւելեալ ժամանակ տալ. այդ պատճառով նաեւ որոշուած է Կազայի դէմ ցամաքային գործողութիւնը յետաձգել:
Միւս կողմէ, «Համաս»ի քաղաքական գրասենեակի ղեկավար Խալետ Մաշաալ Գահիրէի մէջ տրուած մամլոյ ասուլիսի մը ընթացքին յայտնեց. «Մեր դատը իր ամէնէն դժուար եւ փառաւոր պահերը կ՛ապրի, եւ պաղեստինեան դիմադրութեամբ կը հպարտանանք», շեշտելով, որ Կազայի դէմ յարձակումին սկսելէն միայն 48 ժամ ետք, կարելի եղած է հաւասարակշռութիւն հաստատել ճակատող կողմերուն միջեւ, եւ՝ «Կազայի մէջ Իսրայէլի նպատակները ձախողեցան»: Ան աւելցուց, թէ այս յարձակումով Իսրայէլի վարչապետ Պենիամին Նեթանիահու փորձեց Յունուարին կայանալիք Իսրայէլի խորհրդարանական ընտրութիւններուն յաղթանակ ապահովել, «սակայն ան յուսախաբ եղաւ եւ մտահոգ վիճակի մէջ գտնուեցաւ»:
Մինչ այդ, պաղեստինեան խմբաւորումները Ռամալլայի մէջ յայտարարեցին, որ կը միաւորուին ընդդէմ «Կազայի վրայ իսրայէլեան յարձակումին»:
Իր կարգին, Իսրայէլի նախագահ Շիմոն Փերեզ, պաղեստինեւիսրայէլեան հարցով միջազգային քառեակի ներկայացուցիչ եւ Բրիտանիոյ նախկին վարչապետ Թոնի Պլերի հետ իր ունեցած հանդիպումէն ետք յայտնեց, որ կը գնահատէ Կազայի ճակատումը զսպելու նպատակով Եգիպտոսի նախագահ Մուհամմատ Մուրսիի ջանքերը: Ան նաեւ պնդեց, թէ Իրան կը շարունակէ «Համաս»ի զէնք ու զինամթերք մատակարարել:
Իսրայէլեան «Հաարեց» թերթը կը հաղորդէ, որ հարցախոյզ մը ցոյց տուած է, թէ իսրայէլացիներուն նուազ քան մէկ երրորդը կը զօրակցի Կազայի դէմ ցամաքային գործողութեան մը, մինչ իսրայէլեան պատկերասփիւռի 2րդ կայանը կը հաղորդէ, թէ Նեթանիահու բուռն ճնշումներու կ՛ենթարկուի, որպէսզի Կազայի դէմ ցամաքային գործողութիւն մը չշղթայազերծէ:
Իսրայէլի զբօսաշրջութեան նախարարութիւնը յայտնեց, որ հարաւային Իսրայէլի դէմ արձակուած հրթիռները զբօսաշրջութեան զգալի վնաս հասցուցած են: Ըստ Իսրայէլեան պատկերասփիւռի 10րդ կայանին՝ առնուազն 6000 զբօսաշրջիկներ Իսրայէլ իրենց այցելութեան ծրագիրները ջնջած են:
Նաեւ, եւրոպական երկիրներու Ողիմպիական խաղերու ազգային յանձնախումբերու համագումարը, որ որոշուած էր կայացնել Իսրայէլի մէջ, Դեկտեմբեր 7-8ին, այժմ որոշուեցաւ տեղափոխել ու կատարել Հռոմի մէջ:
Ըստ «Ետիոթ Ահրոնոթ»ին՝ Կազայի դէմ գործողութեանց հետեւանքով, հարաւային Իսրայէլ գտնուող գործարանները ցարդ առնուազն  30 միլիոն տոլարի վնաս կրած են:

LEAVE A REPLY

Please enter your comment!
Please enter your name here