Օսկանեան Պիտի Չառաջադրէ Իր Թեկնածութիւնը

0
29

Բարգաւաճ Հայաստան կուսակցութեան պատգամաւոր Վարդան Օսկանեան իր դիմատետրի էջին վրայ անդրադարձած է յառաջիկայ տարի կայանալիք նախագահական ընտրութիւններուն՝ պաշտօնապէս յայտարարելով, որ ինք իր թեկնածութիւնը պիտի չառաջադրէ։ Ան նաեւ նշած է, որ կուսակցութեան անդամները, որոնց հետ ան վերջին օրերուն հանդիպումներ ունեցած է, արտայայտուած են կուսակցութեան առաջնորդ Գագիկ Ծառուկեանի առաջադրման օգտին:
«Կարծես թէ Բարգաւաճ Հայաստան կուսակցութիւնը սկսում է կողմնորոշուել նախագահական ընտրութիւններին մասնակցելու ձեւաչափի հարցում:
«Չնայած այն հանգամանքին, որ հէնց Գագիկ Ծառուկեանի առաջարկով որպէս առաջնային տարբերակ քննարկուել է իմ թեկնածութիւնը, կուսակցութեան անդամները արտայայտուել են յօգուտ Ծառուկեանի առաջադրման», գրած է ան։ Բայց եւ այնպէս ան ուղղակի կերպով չէ յայտարարած, որ Ծառուկեան պիտի առաջադրուի։ «Ծառուկեանը ժողովրդի մօտ մեծ հեղինակութիւն եւ համակրանք է վայելում: Միաժամանակ, ժողովրդի եւ քաղաքական ուժերի մօտ պահանջ կայ հասարակական համախմբման եւ համակարգային լուրջ փոփոխութիւններ ենթադրող օրակարգի հիման վրայ միասնական ուժերով, ինչու չէ՝ նախագահական ընտրութիւններին նաեւ միասնական թեկնածուով երկիրը դուրս բերել ծանր վիճակից», դիտել տուած է ան։
Այսպիսով, Օսկանեան ակնարկութիւն կատարած է այն մասին, որ իր թեկնածութիւնը կրնայ առաջադրել երրորդ անձ մը, «ով կը համախմբի քաղաքական ուժերին», կամ ալ կրնայ ըլլալ, որ ոչ ոք առաջադրուի:
Չի բացառուիր նաեւ, որ քաղաքական ուժերը համաձայնութիւն կայացնեն գործող նախագահ Սերժ Սարգսեանի հետ եւ սատարեն անոր թեկնածութեան, եթէ ան համաձայն գտնուի ընդդիմութեան առաջադրած միացեալ օրակարգին: Այդ օրակարգը արդէն ձեւաւորուած է, եւ եթէ մէկը, նոյնինքը Սերժ Սարգսեանը, յայտարարէ զայն իրականացնելու պատրաստակամութեան մասին, ընդդիմութիւնը սեփական թեկնածու առաջադրելու ոչ մէկ պատճառ կ՛ունենայ։

 

LEAVE A REPLY

Please enter your comment!
Please enter your name here