Զինադադար Կազայի Եւ Իսրայէլի Միջեւ

0
39

Երէկ՝ Չորեքշաբթի, 21  Նոյեմբերին,, Եգիպտոսի արտաքին գործոց նախարար Մումահհէտ Ամր յայտարարեց, թէ կարելի եղած է զինադադարի համաձայնութիւն մը գոյացնել Իսրայէլի ու պաղեստինեան «Համաս»ի միջեւ՝ կասեցնելու համար 8 օր տեւած Կազայի ճակատումները: Սակայն, Իսրայէլ կտրուկ կերպով մերժած է Կազայի շրջափակումը վերցնելու եւ պաղեստինցի ղեկավարներու ահաբեկումները դադրեցնելու պաղեստինեան պայմանները:
Միջնորդական առաքելութեամբ շրջանը գտնուող Միացեալ Նահանգներու պետական քարտուղար Հիլարի Գլինթըն, Իսրայէլի ու Պաղեստինեան իշխանութեանց հետ ունեցած խորհրդակցութիւններէն ետք Եգիպտոս ժամանեց ու զինադադար հաստատելու նպատակով իր խորհրդակցութիւնները շարունակեց Եգիպտոսի նախագահին ու արտաքին գործոց նախարարին հետ:
Մինչեւ զինադադարի հաստատման մասին լուրերու հրապարակումը, Իսրայէլ աւելի բռնութեամբ կը ռմբակոծէր Կազան, մինչ Թել Աւիւի մէջ պայթումի մը հետեւանքով մօտաւորապէս 15 իսրայէլացիներ վիրաւորուեցան: Ութօրեայ բախումներուն ընթացքին սպաննուեցան աւելի քան 150 պաղեստինցիներ եւ 5 իսրայէլացիներ:
Յայտնենք, թէ ՄԱԿ-ի Ապահովութեան Խորհուրդը  երկու առիթներով , Միացեալ Նահանգներու ցուցաբերած ընդդիմութեան պատճառով, ձախողեցաւ Կազայի մէջ զինադադար հաստատելու շուրջ բանաձեւ մը քուէարկել:

LEAVE A REPLY

Please enter your comment!
Please enter your name here