Սուրիան Քանդել փորձող Վարձկաններուն Մէջ Ազերի եւ Թուրք Քաղաքացիներ

0
42

Սուրիա ՄԱԿ-ի Անվտանգութեան Խորհուրդին ներկայացուցած է երկրին մէջ ընթացող քաղաքացիական պատերազմի ժամանակ սպաննուած արտասահմանցի 143 ահաբեկիչներու ցուցակ մը, որուն մէջ կան Ատրպէյճանի եւ Թուրքիոյ քաղաքացիներ: Այս մասին, ինչպէս կը հաղորդէ «Արմենփրէս»-ը, կը յայտնէ Inner City Press լրատուական գործակալութիւնը: Կը նշուի, որ բոլոր վարձկանները կռուած են ընդդիմութեան կողքին: Ցուցակին մէջ տեղ գտած  Քաթարի, Սէուտական Արաբիոյ, Թունիսի, Եգիպտոսի, Սուտանի, Լիպիոյ, Աֆղանիստանի, Յորդանանի, Թուրքիոյ, Եմենի, Իրաքի, Քուէյթի, Լիբանանի, Ալժիրի, Չատի, Փաքիստանի քաղաքացիներու կողքին տեղ կան նաեւ Ատրպէյճանէն, Չեչնիայէն, ինչպէս նաեւ պաղեստինցիներ ահաբեկիչներ:

Նախապէս ՄԱԿ-ի կեդրոնակայանին ներկայացուած էին անկախ փորձագիտական տուեալներ, ըստ որոնց` Սուրիոյ մէջ կը կռուէին 11 երկիրներէ խուժած վարձկաններ:

19 Հոկտեմբեր 2012-ին սուրիական ՍԱՆԱ լրատուական գործակալութիւնը հաղորդած էր, որ Հալէպի մէջ պետական զօրամիաւորումներու կողմէ ոչնչացուած ահաբեկչական խմբաւորման մէջ սպաննուած է Ատրպէյճանի քաղաքացի Եասին Ղազլըն: Հետաքննութիւնը պարզած էր, որ ատրպէյճանցի ահաբեկիչը աւազակային խումբի մը հետ Սուրիոյ տարածք մուտք գործած է Թուրքիայէն: Նոյեմբեր 9-ին իրանական լրատուամիջոցները յայտնած էին, որ կառավարական ուժերու կողմէ ահաբեկիչներու դէմ իրականացուցած գործողութիւններու արդիւնքով սպաննուած է Ատրպէյճանի քաղաքացի Զաուր Իսլամովը: Նշուած է, որ սպաննուած ահաբեկչական խումբի կազմին մէջ եղած են Սէուտական Արաբիոյ եւ Ատրպէյճանի քաղաքացիներ:

Ատրպէյճանի կողմէ Սուրիոյ հակակառավարական ուժերուն օգնութիւն ցուցաբերուելու մասին արդէն շատոնց յայտնի է: Դեռ Հոկտեմբերին իրանական լրատուամիջոցները յայտնած էին, որ Թուրքիոյ միջնորդութեամբ Ատրպէյճանը սուրիացի ահաբեկիչներուն 500 հազար եուրոյի օգնութիւն յատկացուցած է: Օգոստոսի վերջաւորութեան Սուրիոյ նախագահ Պաշար Ասատ երկրի մէջ անկարգութիւններու մէջ մեղադրած է Թուրքիոյ կառավարութիւնը՝ յայտարարելով, որ «Թուրքիան անմիջական պատասխանատուութիւն կը կրէ Սուրիոյ մէջ տեղի ունեցող արիւնահեղութեան համար»:

 

LEAVE A REPLY

Please enter your comment!
Please enter your name here