ԵԱՀԿ Միսնքի Խումբի Համանախագահները Ժամանած Են Արցախ

0
39

Արցախի Հանրապետութեան նախագահ Բակօ Սահակեան Նոյեմբեր 22-ին ընդունած է Ստեփանակերտ ժամանած ԵԱՀԿ Մինսքի խումբի համանախագահներ Ռոպըրթ Պրատքէն (Միացեալ Նահանգներ), Իկոր Փոփովը (Ռուսիա), Ժաք Ֆորը (Ֆրանսա) եւ անոնց ուղեկցողները:

Ինչպէս «Արմենփրէս»-ին տեղեկացուցած է ԼՂՀ նախագահի աշխատակազմի տեղեկատուութեան գլխաւոր վարչութենէն, հանդիպումի ընթացքին քննարկուած են ատրպէյճանա-ղարաբաղեան հակամարտութեան կարգաւորման եւ տարածաշրջանային վերջին զարգացումներուն առնչուող հարցեր:

Հայ սպային նենգաբար կացինահարած յանցագործին հերոսացումը Ատրպէյճանի մէջ, այդ պետութեան կողմէ մարդասիրական հարցերու քաղաքականացումը եւ ռազմատենչ ու ահաբեկչական հռետորաբանութիւնը Բակօ Սահակեան որակած է անթոյլատրելի` աւելցնելով, որ ատիկա բանակցային գործընթացին հասցուած ամենալուրջ հարուածներէն է: Այս պարունակին մէջ երկրի ղեկավարը կոչ ըրած է համապատասխան քայլեր ձեռնարկելու Ատրպէյճանը կառուցողական հուն բերելու ուղղութեամբ: Նախագահ Սահակեան եւս մէկ անգամ ընդգծած է, որ պաշտօնական Ստեփանակերտը կողմնակից է հակամարտութեան խաղաղ կարգաւորման, ԵԱՀԿ Մինսքի խումբի հովանիին տակ ընթացող բանակցային գործընթացի լիարժէք ձեւաչափի վերականգնման:

Բակօ Սահակեան հերթական անգամ վերահաստատած է, որ հակամարտութեան կարգաւորումը հնարաւոր է միայն հաշուի առնելով առկայ իրողութիւնները, կեդրոնանալով դրդապատճառներուն, այլ ոչ թէ հետեւանքներու վերացման վրայ` նշելով, որ անցեալին վերադառնալու որեւէ փորձ դատապարտուած է ձախողման:

Հանդիպումին ներկայ էին Արցախի Հանրապետութեան արտաքին գործոց նախարար Կարէն Միրզոյեան, ԵԱՀԿ գործող նախագահի անձնական ներկայացուցիչ, դեսպան Անճէյ Քասփրչիք, պաշտօնատար այլ անձիք:

LEAVE A REPLY

Please enter your comment!
Please enter your name here