Ստեփանակերտէն Թռիչքներ Թոյլ Տալու Պարագային Ատրպէյճանը Ստիպուած Պիտի Ըլլայ Ճանչնալ ԼՂՀ-ն. Ատրպէյճանի Նախագահի Նախկին Խորհրդական

0
36

Ատրպէյճանի մէջ կը շարունակուին Ստեփանակերտի օդակայանը շահագործման յանձնելու շուրջ քննարկումները: Այս մասին կը հաղորդէ «Արմենփրէս»-ը` վկայակոչելով ատրպէյճանական լրատուամիջոցները: Ատրպէյճանական «Հանդուրժողականութիւն» հետազօտութիւններու կեդրոնի ղեկավար Ազեր Ռաշիտօղլուն այդ առնչութեամբ յայտարարած է, որ «Լեռնային Ղարաբաղէն միջազգային թռիչքներու իրագործումը գլխացաւ պիտի դառնայ Ատրպէյճանի համար»:

Ռաշիտօղլուի խօսքով` ամենայն հաւանականութեամբ, Եւրոպայի եւ ԱՄՆ-ի հայկական սփիւռքի շնորհիւ, Ստեփանակերտի օդակայանը կը գովազդուի: «Ես չեմ զարմանար, եթէ Ղարաբաղի օդակայան իջնէ Շառլ Ազնաւուրը: Այդ ժամանակ Ատրպէճյանի համար դժուար պիտի ըլլայ խոչընդոտել այդ օդակայանէն թռիչքները», -ընդգծած է ան: Փորձագէտը ըսած է նաեւ, որ Ռուսաստանին շահաւէտ պիտի ըլլայ խաղաղարար ուժեր տեղակայել Լեռնային Ղարաբաղ եւ, որ նման հանգամանքերու մէջ, Ատրպէյճանի համար արդէն անհնար կ’ըլլայ վերադարձնել Ղարաբաղը:

Ատրպէյճանի նախագահի նախկին խորհրդական, քաղաքագէտ Ուաֆա Գուլուզատէն իր հերթին նշած է, որ Ատրպէյճանը «չի կրնար եւ պէտք չէ թոյլ տայ թռիչքներ Ղարաբաղէն Երեւան»: «Եթէ ատիկա տեղի ունենայ, ապա Ատրպէյճանը ստիպուած պիտի ըլլայ ճանչնալ նաեւ Լեռնային Ղարաբաղի Հանրապետութեան անկախութիւնը», -համոզում յայտնած է ան:

LEAVE A REPLY

Please enter your comment!
Please enter your name here