Վաղուան Հայաստանը Շատ Աւելի Լաւը Պիտի Ըլլայ, Քան Այսօր. Սերժ Սարգսեան

0
54

ՀՀ նախագահ Սերժ Սարգսեան Նոյեմբեր 22-ին ընդունած է “Սինափթիքս” ընկերութեան պատուաւոր նախագահ, Տեղեկատուական ճարտարագիտութիւններու  ոլորտին մէջ համաշխարհային ներդրման համար ՀՀ նախագահի 2012-ի մրցանակին արժանացած Ֆետերիքօ Ֆաճինը: Այս մասին կը հաղորդէ ՀՀ նախագահի մամուլի գրասենեակը:

Հանդիպման յաջորդած է մրցանակի յանձնման առիթով` ի պատիւ պարոն Ֆետերիքօ Ֆաճինի եւ տիկին Էլվիա Ֆաճինի նախագահի նստավայրին մէջ կազմակերպուած ընդունելութիւնը, որուն ընթացքին Համաշխարհային տեղեկատուական ճարտարագիտութիւններու (ՀՏՃ) մրցանակաբաշխութեան կոմիտէի գործադիր խորհուրդի նախագահ Յովիկ Մուսայելեան ներկայացուցած է մրցանակակիրի ընտրման ընթացակարգը, իսկ ՀՏՃ մրցանակաբաշխութեան կոմիտէի համանախագահ Ռիչ Կոլտման իր ելոյթին մէջ անդրադարձած է ՀՀ նախագահի մրցանակի գաղափարին եւ առաքելութեան, ներկայացուցած մրցանակի արժանացած Ֆետերիք Ֆաճինը:

Մրցանակի յանձնման առիթով նախագահ Սերժ Սարգսեան հանդէս եկած է ելոյթով, ուր կ’ըսուի.

“Յարգելի՛ պարոն Ֆաճին եւ տիկի՛ն Ֆաճին,
յարգելի՛ տիկնայք եւ պարոնայք,
Ուրախ եմ ողջունելու Երեւանի մէջ “Սինափթիքս” ընկերութեան պատուաւոր նախագահ, նշանաւոր ճարտարագէտ պարոն Ֆետերիքօ Ֆաճինը:
Պատուաւոր հիւրերուն բարի գալուստ մաղթելը պետութեան ղեկավարի հաճելի պարտականութիւններէն մէկն է: Այդտեղ իսկ այդ հեշտ ու հաճելի մասը շատ արագ կ’աւարտի` իր տեղը զիջելով սովորաբար փակ դռներու ետին իրականացուող քաղաքական քննարկումներուն:

Այդպիսին չի այս դէպքը: Մեր հիւրը մեծ գիտնական է, որուն ժամանումը կապուած է անոր ստեղծագործական վաստակի ճանաչման հետ: Այսօր Երեւանի մէջ պարոն Ֆետերիքօ Ֆաճինին կը շնորհենք Տեղեկատուական ճարտարագիտութիւններու ոլորտին մէջ համաշխարհային ներդրման համար մեր մրցանակը:
Պարոն Ֆաճինը յայտնի է իբրեւ բազմաթիւ նորարարական գաղափարներու հեղինակ: Սակայն անոր անունը ընդմիշտ ոսկէ տառերով գրուած է տեղեկատուական ճարտարագիտութիւններու տարածման պատմութեան մէջ` իբրեւ առաջին փոքր-գործողութիւններու նախագծման եւ զարգացման աշխատանքներու գործընթացի ղեկավար:

Այս մրցանակը Հայաստանի Հանրապետութեան ինքնատիպ ներդրումն է համաշխարհային մակարդակով տեղեկատուական ճարտարագիտութիւններու զարգացման գործին մէջ: Այս մրցանակով մենք կը պատուենք պարոն Ֆաճինը եւ անոր գործընկերները` տեղեկատուական ճարտարագիտութիւններու միջոցով գիտելիքը ամէնուր մատչելի դարձնելու համար: Համակարգիչներն ու համացանցը իսկապէս լուրջ յառաջընթաց կ’ապահովեն ամբողջ մարդկութեան համար` խթանելով գիտութեան տարածումը, ուստի եւ` զարգացումն ու բարեկեցութիւնը:

Յարգելի՛ տիկնայք եւ պարոնայք,
Վերջին տարիներուն Հայաստանը արձանագրած է զգալի յառաջընթաց տեղեկատուական եւ թուային ճարտարագիտութիւններու զարգացման բնագաւառին մէջ: Այս մրցանակին նպատակն է խթանել այդ յառաջընթացը եւ, ամենակարեւորը, սեւեռել երիտասարդութեան ուշադրութիւնը տեղեկատուական եւ թուային ճարտարագիտութիւններու ոլորտի լայն հնարաւորութիւններուն վրայ: Մենք ատիկա ըրած ենք, կ’ընենք եւ պիտի ընենք` փորձելով ամենաւաղ հասակէն բացայայտել երեխաներու ստեղծագործական տաղանդը:

Ես վստահ եմ, որ ատիկա Հայաստանի զարգացման նպաստող ամենաճիշդ ճանապարհն է: Միայն մեր երեխաներուն լուրջ կրթութեան տալու միջոցով մենք կրնանք ապահովել մեր երկրի արժանի տեղը ոչ միայն այս տարածաշրջանին մէջ, այլեւ` ամբողջ աշխարհի:

Մեր որոշ հարեւաններ պատեհ եւ անպատեհ առիթներով շատ կը խօսին մեզ մեկուսացնելու, տնտեսական զարգացում ենթադրող ծրագրերէն մեզ դուրս ձգելու մասին: Սակայն իրականութեան մէջ անոնք իրենց հասարակութիւնը կը մեկուսացնեն: Կը քարոզեն պատերազմ եւ այլատեացութիւն: Կ’արգելափակեն խօսքի եւ տեղեկատւութեան ազատութիւնը: Համացանցը, հասարակական ցանցերը կը պատկերացնեն միայն իբրեւ ատելութեան, սուտի ու յոխորտանքի տարածման միջոց` շատ չտարբերելով զանոնք քնացած մարդը սպաննող կացինէն: Եւ դեռ ժամանակը ցոյց պիտի տայ, թէ որուն կը վնասեն եւ աւերներ կը գործեն իրենց` խանական ոճի նման քաղաքականութեամբ:

Կրթուած սերունդ դաստիարակելու, մասնագիտական ոլորտներու մէջ գերազանցութիւն ձեռք բերելու միջոցով մենք կը կերտենք Հայաստանի ապագան: Վաղուան Հայաստանը շատ աւելի լաւը պիտի ըլլայ, քան կայ այսօր, եւ այդ նոր Հայաստանը պիտի կայանայ այն բոլոր ներդրումներուն շնորհիւ, որոնք մենք այսօր կը կատարենք մեր ամենամեծ հարստութեան` մարդու մէջ: Մենք կը փառաբանենք պարոն Ֆաճինի պէս պայծառ մարդոց` իբրեւ ուղեցոյց մեր զաւակներուն, թէ ինչպէս պէտք է ապրիլ ու գործել:

Ընդամէնը մէկ տարիէն քիչ ժամանակ անցած է “Թումօ” ստեղծարար ճարտարագիտութիւններու կեդրոնի բացումէն ի վեր: Այսօր արդէն այդ կեդրոնը շեշտակի կ’ընդլայնէ եւ կ’ընդարձակէ իր գործունէութիւնը` ներգրաւելով նորանոր երեխաներ: Այնտեղ ստեղծուած են պայմաններ, որպէսզի երեխաները կրնան յատուկ կրթութիւն ստանալ: Շատ կարեւոր կը համարեմ այն հանգամանքը, որ այդ երեխաներուն հնարաւորութիւն տրուած է իրենց դրսեւորելու` անկախ իրենց ընտանիքներու տնտեսական վիճակէն:

Ասիկա տեղեկատուական եւ թուային ճարտարագիտութիւններու զարգացման բնագաւառին մէջ մեր բռնած երկար ճանապարհի ընդամէնը առաջին հատուածն է: Այս ոլորտին մէջ մեր յառաջընթացն ու զարգացումը անշեղ եւ վերընթաց պիտի ըլլայ:
Յարգելի՛ տիկնայք եւ պարոնայք,
յարգելի՛ պարոն Ֆաճին,
Մեր ժողովրդի տաղանդին շնորհիւ եւ մեր բարեկամներու աջակցութեամբ մենք կը պատրաստուինք յառաջատար դիրքեր զբաղեցնելու տեղեկատուական ճարտարագիտութիւններու բնագաւառին մէջ: Վստահ եմ, որ այդ ճանապարհին դուք, պարո՛ն Ֆաճին, միշտ պիտի ըլլաք մեր կողքին:

Կրկին կը շնորհաւորեմ Ձեզ այս մրցանակին արժանանալու առիթով: Շատ ուրախ եմ, որ դուք այստեղ էք` մեզի հետ: Յոյսով եմ, որ այս կարճատեւ այցին ընթացքին Դուք պիտի կրնաք ծանօթանալ նաեւ մեր երկրին ու մեր մշակոյթին: Իսկ մենք միշտ ուրախ ենք հանդիպելու մեր բարեկամներուն եւ ջերմութիւնը մեր սրտերուն մէջ` կը սպասենք անոնց նոր այցելութիւններուն: Մէկ անգամ եւս կը շնորհաւորեմ եւ կը մաղթեմ Ձեզ նորանոր յաջողութիւններ”:

LEAVE A REPLY

Please enter your comment!
Please enter your name here