Հայաստանը Պատրաստ է Շէնկէն Գօտիի Երկիրներու Զբօսաշրջիկներու Հոսքին

0
45

Շէնկէնեան երկիրներու քաղաքացիներուն համար մուտքի վիզայի վարչակարգին դադրեցումը պիտի խթանէ զբօսաշրջիկներու նոր խումբերու հոսքին դէպի Հայաստան:

Եւրոմիութեան անդամ 27 պետութիւններու, ինչպէս նաեւ կառոյցի անդամ չհանդիսացող, սակայն Շէնկէնեան դրոյթները (Schengen Acquis) կիրառող չորս պետութիւններու(Իսլանտա, Լիխթենշթէյն, Նորվեգիա եւ Զուիցերիա) քաղաքացիները 10 Յունուար 2013-էն կրնան Հայաստան ժամանել առանց մուտքի վիզայի: Ինչպէս «Արմէնփրես»-ին յայտնեց ՀՀ տնտեսութեան նախարարութեան զբօսաշրջութեան վարչութեան պետ Մեխակ Ապրէսեան, մեր երկիրը պատրաստ է ընդունելու զբօսաշրջիկներու նոր խումբերու, մանաւանդ որ Հայաստան մուտք գործելը աւելի մատչելի պիտի դառնայ եւրոպական երկիրներէն ժամանող հեծանիւային եւ քայլարշաւային զբօսաշրջութեան սիրահարներուն համար:

Վարչութեան պետի դիտարկումով` եթէ նախկապէս ներգնայ զբօսաշրջիկներու այցելութեան հիմնական նպատակը իրենց հարազատները տեսնելն էր կամ պատմամշակութային արժէքներուն ծանօթանալը, ապա ներկայիս Հայաստանի մէջ արագ չափերով կը զարգանայ էքոթուրիզմը, ձմեռնային, առողջարանային, արկածային եւ ժամանցային զբօսաշրջութիւնը: Ընդլայնուած է նաեւ զբօսաշրջային եղանակը. ան արդէն կը սկսի Մարտի կէսերէն եւ կը շարունակուի մինչեւ Նոյեմբերի կէսերը: Վերջին տարիներուն միտում կը նկատուի, որ օտարերկրացիները Նոր տարին կը ցանկանան անցնել Հայաստանի մէջ: «Ակնկալւում է, որ Հայաստան ներգնայ զբօսաշրջային այցելութիւնները 2013 թուականին կ’աճեն տասը տոկոսով: Այդ ցուցանիշը ձգտելու ենք հաստատուն դարձնել նաեւ գալիք տարիների համար»,- ընդգծած էԱպրէսեան: Հայաստան պատրաստ է ընդունելու նոր զբօսաշրջիկներու նոր հոսքերու մեծացման պարագային: «Ննջատեղերի քանակի պակաս է զգացւում, որը, սակայն, աստիճանաբար կարգաւորւում է մասնաւոր հատուածի կողմից: Զբօսաշրջութեան ոլորտն այդ առումով ազատ դաշտ է ընձեռում մասնաւոր հատուածին պիզնես ծաւալելու համար»,-նկատած է Զբօսաշրջութեան վարչութեան պետը:

Ըստ հիւրանոցային տնտեսութիւններու տուեալներուն` 2010-2011 թուականններուն եւրոպական երկիրներէն Հայաստան այցելած զբօսաշրջիկները միջին 30 տոկոս են: Անոնք հիմնականօրէն միջին եւ բարձր տարիքային խումբերու ներկայացուցիչներ են, որոնք կը նախընտրեն ճանապարհորդել պտոյտ-փաթեթներով: Սովորաբար պտոյտ փաթեթով այցելող զբօսաշրջիկներու շրջանակին մէջ ծախսերու դրոյքաչափը շատ աւելի բարձր է:

Մեխակ Ապրէսեան նշած է նաեւ, որ երկիր մուտքի դիւրացման զուգահեռ բանակցութիւններ են վարեն Հայաստան մեծամասշտաբ միջազգային միջոցառումներ իրականացնեթու ուղղութեամբ, որ իր հերթին կը խթանէ քաղաքական զբօսաշրջութեան զարգացումին: «Հոկտեմբերին արդէն անցկացուել են երկու կարեւոր միջազգային միջոցառումներ` ՄԱԿ-ի ԶՀԿ-ի համագործակցութեան շրջանակներում` զբօսաշրջութեան ոլորտի երկօրեայ միջազգային համաժողովը եւ ԱՊՀ անդամ պետութիւնների հերթական խորհրդի նիստը` Զբօսաշրջութեան ոլորտում: Այժմ նոր քննարկումներ են տեղի ունենում նման ծաւալի միջազգային միջոցառումների կազմակերպման ուղղութեամբ»,- աւելցուցած է Ապրէսեան:

Միջազգային միջոցառումները կը նպաստեն ոչ միայն մեր երկրի` միջազգային զբօսաշրջային շուկային ներկայանալուն եւ իր հաստատուն տեղը ունենալուն,  այլ նաեւ միջազգային ընդելուզման:

 

LEAVE A REPLY

Please enter your comment!
Please enter your name here