Անհրաժեշտ Է Յարգել Ժողովուրդներու Ինքնորոշման Կենսական Իրաւունքը. Իրանի ԱԳ Նախարար

0
17

 Անհրաժեշտ է յարգել ժողովուրդներու ինքնորոշման կենսական իրաւունքը: Այդ մասին՝ ըստ panorama.am-ի՝ Փաքիստանի մէջ տեղի ունեցած «Տի-8» խումբի տնտեսական համագործակցութեան կազմակերպութեան անդամ երկիրներու ԱԳ նախարարներու խորհուրդի նիստին ժամանակ յայտարարած է Իրանի ԱԳ նախարար Ալի Աքպար Սալեհի:

Իրանի ԱԳ նախարարը իր ելոյթի ընթացքին քննադատելով տարբեր երկրներու մէջ մարդու իրաւունքներու նկատմամբ երկակի չափանիշներ կիրառելու փաստը, մասնաւորապէս նշած է. «Ժողովրդավարութիւնը որեւէ երկրի կամ տարածաշրջանի չի պատկանիր. Ուստի ազգերու ինքնորոշման եւ սեփական ճակատագիրը տնօրինելու իրաւունքը կենսական կարեւորութիւն ունի: Պէտք է մերժել բոլոր այն ջանքերը, որոնք ուղղուած են սահմանադրութեան եւ ժողովրդավարութեան հիման վրայ ժողովուրդի կողմէ ստեղծուած կարգերը տապալելուն»:

Նշենք, որ «Տի-8» խումբը կը ներկայացնեն 8 զարգացող երկիրներ` Իրան , Թուրքիա , Փաքիստան, Պանկլատէշ , Ինտոնեզիա , Մալէյզիա ,Եգիպտոս եւ Նիճերիա:

Արցախեան հակամարտութեան ժամանակակից փուլը սկիզբ առաւ 1988-ին, երբ ի պատասխան 1921-ի խորհրդային Ատրպէյճանին բռնակցուած Արցախի (Լեռնային Ղարաբաղ) բնակչութեան ինքնորոշման խաղաղ պահանջին` Ատրպէյճանի իշխանութիւնները էթնիկ զտումներ իրականացուցին հայ ազգաբնակչութեան նկատմամբ նախ` Ատրպէյճանի մեծ քաղաքներուն, ապա Արցախի մէջ: Սեպտեմբեր 1991-ին Արցախը հռչակեց անկախութիւն, որուն արդիւնքով Ատրպէյճանը սաստկացուց բռնութիւնները եւ սկսաւ լայնածաւալ ռազմական գործողութիւններ Արցախի դէմ: Ռազմաճակատի վրայ շարք մը պարտութիւններէ ետք Ատրպէյճանի իշխանութիւնները Մայիս 1994-ին ստիպուած էին զինադադար խնդրել Արցախի Հանրապետութենէն (Լեռնային Ղարաբաղի Հանրապետութիւն):

Ներկայիս  հակամարտութեան կարգաւորման բանակցութիւնները կ’իրականացուին ԵԱՀԿ Մինսքի խումբի համանախագահներու (Ռուսաստան, ԱՄՆ եւ Ֆրանսա) միջնորդութեամբ` Նոյեմբեր 2007-ին ներկայացուած Մատրիտեան առաջարկներու հիման վրայ:

LEAVE A REPLY

Please enter your comment!
Please enter your name here