Ռաֆֆի Յովհաննիսեանի Պաքուի Մէջ Ունեցած Յայտարարութիւնները Ատրպէյճանի Մէջ Իրարանցում Յառաջացուցած Են

0
24

Ասիոյ քաղաքական կուսակցութիւններու 7-րդ համաժողովի աշխատանքներուն մասնակցելու նպատակով Պաքու գտնուող «Ժառանգութիւն» կուսակցութեան առաջնորդ, Հայաստանի Հանրապետութեան նախկին արտաքին գործոց նախարար Ռաֆֆի Յովհաննիսեանի` ատրպէյճանական լրատուամիջոցներու տուած հարցազրոյցը իրարանցում յառաջացուցած է Ատրպէճանի մէջ: Ինչպէս կը հաղորդէ «Արմէնփրես»-ը, Ատրպէյճանի իշխանութեան ներկայացուցիչները եւ յայտնի բոլոր քաղաքագէտները շտապած են անհեթեթ քննադատութիւններ հնչեցնել Լեռնային Ղարաբաղի անկախութիւնը առաջինը Ատրպէյճանի կողմէ ճանչցուելու անհրաժեշտութեան մասին հայ քաղաքական գործիչին ըրած յայտարարութիւններու առնչութեամբ եւ մեղադրել Յովհաննիսեանը Պաքու հրաւիրողները: Ատրպէյճանի հակահայ գաղափարախօսները զայրացուցած է այն, որ Հայաստանի ներկայացուցիչը Պաքուի մէջ ատրպէյճանական հասարակութեան ներկայացուցած է ԼՂՀ հետ կապուած ճշմարտութիւնները:

Haqqin.az-ը այդ առնչութեամբ գրած է, որ Ատրպէյճանի նախագահի նախկին խորհրդական, քաղաքագէտ Վաֆա Կուլուզատէն նոյնիսկ դատապարտած է սեփական կառավարութիւնը` Ռաֆֆի Յովհաննիսեանը Պաքու հրաւիրելու համար: Ան սխալ համարած է հայ քաղաքական գործիչը Պաքու հրաւիրելը ու անոր ամպիոն տրամադրելը: «Յովհաննիսեանը Պաքու հրաւիրելը կոպիտ սխալ է: Կարելի չէր անոր հնարաւորութիւն տալ ելոյթ ունենալու Ատրպէյճանի մէջ: Ելոյթ ունենալով Պաքուի մէջ, ան յայտարարած է, որ իրականութեան մէջ Հայաստանը չէ գրաւած Ատրպէյճանի հողերը, այլ ազատագրած է զանոնք: Անհրաժեշտ է լուրջ հետաքննութիւն իրականացնել, թէ ո՞վ Ատրպէյճանի այդ թշնամին Պաքու հրաւիրած է», -ըսած է Կուլուզատէ:

Ատրպէյճանի երդուեալ հակահայ խօսափողը կը գտնէ, որ մինչեւ «գրաւուած տարածքներ»-ու վերադարձը՝ Հայաստանի հետ նման յարաբերութիւններու ստեղծումը սխալ է: «Օրերս Ատրպէյճանի բռնցքամարտի խումբը պիտի ուղեւորուի Երեւան մասնակցելու միջազգային մրցաշարի: Նման քայլերը կ’ընկալուին իբրեւ Հայաստանի հետ բարեկամական յարաբերութիւններու կարգաւորում եւ կը նշանակէ, որ մենք կը հաշտուինք բռնագրաւման փաստին հետ: Ատիկա անթոյլատրելի է», -յայտարարած է իր զայրոյթը զսպել չկրցած քաղաքագէտը:

Ռաֆֆի Յովհաննիսեանը երէկ Պաքուի մէջ լրագրողներուն ըսած էր, ճիշտ չէ այնպիսի քաղաքական արտայայտութիւններու օգտագործումը, ինչպիսին «բռնագրաւում» բառն է, քանի որ Հայաստանը չի բռնագրաւած Ատրպէյճանի հողերը, այլ ազատագրած է զանոնք, ղարաբաղեան հակամարտութեան պատճառը Լեռնային Ղարաբաղի բնակիչներուն դէմ Ատրպէյճանի թշնամանքն է, Լեռնային Ղարաբաղի բնակիչները ինքնորոշուելու իրաւունք ունին:Նոյն այս ճշմարտութիւնները ատրպէյճանական հասարակութեան հասցնելը Ատրպէյճանի իշխանութիւններուն զայրոյթին պատճառ դարձած է:

LEAVE A REPLY

Please enter your comment!
Please enter your name here