Սուրիոյ Հարցով Թուրքիոյ եւ ՆԱԹՕ-ին Ողջամիտ Ըլլալու Կոչ _Ռուսիայէն

0
55

   Ռուսիա  կը  շարունակէ քննադատել Թուրքիան` թուրք-սուրիական սահմանին Patriot տիպիի հրթիռներ տեղակայելու մտադրութեան համար: Ռուսիոյ  արտաքին գործոց նախարար Սերկէյ Լաւրով հանդէս եկած է յայտարարութեամբ` նախազգուշացնելով թէ՛ Թուրքիան, թէ՛ Հիւսիսատլանտեան դաշինքը:

Լաւրով, յայտնած է, թէ  Թուրքիոյ կողմէ հրթիռներու տեղադրումը աւելի պիտի խորացնէ  տարածաշրջանին մէջ անկայունութիւնը: Ան  նշած է. «Որքան զէնքը շատ ըլլայ, այնքան զայն օգտագործելու վտանգը կը մեծնայ»: Ռուսիոյ  արտաքին գործոց նախարարը նշած է, որ որեւէ վայրի մէջ զէնք տեղադրելը կ’աւելցնէ այդ շրջանին մէջ զանոնք օգտագործելու հաւանականութիւնը: «Այդ զէնքերու ստուերին տակ կը մեծնայ այն ուժերու ախորժակը, որոնք կը ցանկանան Սուրիոյ ճգնաժամային իրադրութեան մէջ օգտագործել արտաքին ուժի գործօնը»,- ըսած է ան:

Նախապէս Թուրքիոյ հանդէպ քննադատութեամբ հանդէս եկած էր Սուրիան, որ սահմանին հրթռիներու տեղադրումը որակած էր իբրեւ նոր սադրանք: Սուրիական իշխանութիւնները մեղադրած էին պաշտօնական Անգարան «լարուածութիւնն ու ճնշումը» աւելցնելու մէջ եւ թուրք-սուրիական սահմանին տեղի ունեցող իրադարձութիւններուն մէջ միակ պատասխանատուն համարած էին Թուրքիոյ վարչապետ Ռեճէպ Թայիփ  Էրտողանը:

Աւելի  կանուխ, Թուրքիան պաշտօնապէս դիմած էր ՆԱԹՕ-ին` սուրիական սահմանին հրթիռներու տեղակայման հարցով, պատճառաբանելով անվտանգութեան նկատառումներ: Հիւսիսատլանտեան դաշինքի գլխաւոր քարտուղար Անտերս Ֆոկ Ռասմուսեն յայտարարած էր, թէ «հրթիռներու տեղակայմամբ Թուրքիա կրնայ իր տարածքն ու բնակչութիւնը պաշտպանել  Սուրիայէն:

LEAVE A REPLY

Please enter your comment!
Please enter your name here