Իտալա-Արաբական Կեդրոնը Կը Միանայ Հայոց Ցեղասպանութեան Ճանաչման Պայքարին

0
48

«Հայոց Ցեղասպանութիւնը մոռցանք բոլորս:  Երիտթուրքերու կառավարութիւնը իրականացուց հայերու ջարդը Անատոլիոյ մէջ, պատմաբաններու գնահատականով` Ցեղասպանութեան զոհ գնաց Օսմանեան կայսրութեան հայերու երկու երրորդը: Դաժան ջարդերուն սպաննուեցան անխտիր բոլորը` առանց սեռի ու տարիքի տարանջատման, երեխանները իսլամացուեցան, կանայք ուղարկուեցան հարեմներ»,- այս մասին` ըստ Armenpress.am-ի` կը գրէ իտալական agenziastampaitalia-ը: Յօդուածագիրը իտալա-արաբական «Ասսատաքա» կեդրոնի գլխաւոր քարտուղար, ռազմական լրագրող Թալալ Խրայիսն է, որ կը յայտարարէ, որ իր ղեկավարած կառոյցը կ’անցնի Հայոց Ցեղասպանութեան ճանաչման գործին: «Մեր կեդրոնը վերջնագիր չի ներկայացներ Թուրքիոյ, անիկա պարզապէս կը յայտարարէ, որ իր պարտքը կը համարէ այսուհետեւ հայ ժողովուրդին հետ բարեկամական համագործակցութեամբ պայքարիլ 1915-ի դէպքերուն վրայ լոյս սփռելու համար»,-կը գրէ ան:

Յօդուածագիրը կը նշէ, որ Հայոց Ցեղասպանութեան նախորդած է Սուլթան Համիտի կողմէ իրականացուած հայերու ջարդն ու արտաքսումը: Այնուհետեւ Երիտթուրքերու կառավարութեան կողմէ 1909-ին սկիզբ կը դրուին հայերու նոր ջարդերուն, որոնք իրենց «տրամաբանական» գագաթնակէտին կը հասնին 1915-ին: Ռազմական լրագրողին խօսքով` ներկայիս Թուրքիան նոյնպէս ջարդեր կ’իրականացնէ` կրկին սպաննելով հայերը, քիրիստոնեաները եւ ազգային փոքրամասնութիւնները` այս անգամ աջակցելով Սուրիոյ գրոհայիններուն: «Երէկ եւ այսօր, եւ հին ու նոր Օսմանեան կայսերութիւնները չեն ընդունիր իրենց ոճրագործութիւնները: Թերեւս միակ եւրոպական երկիրը, որ քաջութիւն ունեցաւ հաւատարիմ մնալու անմեղ զոհերու յիշատակին` Ֆրանսան էր, որ յայտարարեց, որ նման կեցուածք որդեգրած Թուրքիան Եւրոմիութեան համար չէ: «Եւրոմիութիւնը Թուրքիոյ համար չէ: Իմ դիրքորոշումը այս հարցին առնչութեամբ կը մնայ անփոփոխ»,- ըսաւ Ֆրանսայի նախկին նախագահ Նիքոլա Սարքոզին` Երեւանի մէջ ՀՀ նախագահ Սերժ Սարգսեանի հետ ունեցած համատեղ ասուլիսին:

Յօդուածի աւարտին Թալալ Խրայիս կ’ընդգծէ, որ ի հեճուկս հայ ազգին պատուհասած տառապանքներուն, հայերը կը շարունակեն իրենց հարեւաններուն հետ խաղաղութեան եւ համագործակցութեան քաղաքականութիւն վարել: Ան, մասնաւորապէս, կը նշէ հայ-իրանական համակողմանի յարաբերութիւններուն մասին, աւելի հեռու հարեւաններէն կը յիշատակէ` հայ-ռումանական, հայ-իտալական յարաբերութիւնները: «Այս ազգը շատ տանջանքներ տեսած է, բայց յաղթահարած է այդ ամէնը. անիկա  ուժեղ եւ բարգաւաճող երկիր է»,- կ’եզրափակէ յօդուածագիրը:

Իտալա-արաբական կեդրոնը հիմնուած է 1995-ին` Իտալիոյ եւ Արաբական երկիրներու միջեւ յարաբերութիւններու զարգացման նպատակով: Կեդրոնը մասնաճիւղեր ունի Իտալիոյ բազմաթիւ քաղաքներու մէջ: Կեդրոնին կ’անդամակցին լրագրողներ, ակադեմիկոսներ, գիտնականներ, Իտալիոյ խորհրդարանի պատգամաւորներ, Իտալիոյ քաղաքական բոլոր կուսակցութիւններու ներկայացուցիչները եւ այլք:

 

 

LEAVE A REPLY

Please enter your comment!
Please enter your name here