ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԻՒՆԸ ԿԸ ՄԱՍՆԱԿՑԻ ՍԷՈՒՏԱԿԱՆ ԱՐԱԲԻՈՅ ԹԱԳԱՒՈՐԻ ՀԻՄՆԱԾ ԿԵԴՐՈՆԻ ԲԱՑՄԱՆ

0
37

Սէուտական Արաբիոյ թագաւորը Ապտալլահ պըն Ապտ–էլ–Ազիզ Վիեննայի մէջ (Աւստրիա) հիմնեց Կրօններու ու Մշակոյթներու Երկխօսութեան Միջազգային Կեդրոն մը: Սոյն Կեդրոնի հիմնադրութեան իրենց մասնակցութիւնը բերին ու ապագային անոր գործունէութեան պիտի մասնակցին նաեւ Աւստրիոյ եւ Սպանիոյ պետութիւնները:

Յիշեալ Կեդրոնին բացումը տեղի ունեցաւ Երկուշաբթի, 26 Նոյեմբերին, մասնակցութեամբ երեք երկիրներու պետական պատասխանատուներուն եւ խումբ մը յատուկ հրաւիրեալներու: Ն.Ս.Օ.Տ.Տ. Արամ Ա. Կաթողիկոս հրաւիրուած էր անձամբ իր մասնակցութիւնը բերելու բացման, ինչպէս նաեւ անոր անմիջապէս յաջորդող սեմինարին: Յանուն Վեհափառ Հայրապետին ու Մեծի Տանն Կիլիկիոյ Կաթողիկոսութեան ներկայ գտնուեցան Գերշ. Տ. Սեպուհ Արք. Սարգիսեան, Առաջնորդ Թեհրանի հայոց թեմին, եւ Տիկին Թենի Սիմոնեան–Փիրրի, Կաթողիկոսարանի Միջ–եկեղեցական Յարաբերութեան Յանձնախումբի Փոխ–ատենապետուհի:

Այս առիթով Վեհափառ Հայրապետը գրաւոր յատուկ պատգամ մը ուղղեց  ուր ողջունելով յիշեալ Կեդրոնի բացումը, զայն նկատեց «մեծապէս գնահատելի նախաձեռնութիւն մը` յատկապէս քրիստոնեայիսլամ երկխօսութեան ու գործակցութեան այս վճռական հանգրուանին»: Անդրադառնալով համաշխարհայնացած ներկայ աշխարհին մէջ տարբեր հաւատքի, մշակոյթի ու ազգութեան պատկանող համայնքներու գոյակցութեան, Վեհափառ Հայրապետը շեշտեց այդ «գոյակցութիւնը աւելի ամրապնդելու հրամայականը` ներկայ ընկերութեան դիմագրաւած մարտահրաւէրներու ու մտահոգութիւններու դիմաց»: Վեհափառը յիշեց թէ «քրիստոնէութիւնը եւ իսլամութիւնը հասարակաց արժէքներ ու աւանդութիւններ ունին, որպէս միաստուածեան կրօններ: Հետեւաբար, անհրաժեշտ է ամրապնդել ինչ որ կը միացնեն երկու կրօնները միաժամանակ յարգելով անոնց տարբերութիւնները»: Իր պատգամի վերջաւորութեան Վեհափառը կը յիշեցնէ թէ «հայ ժողովուրդը իսլամութեան հետ դարեր շարունակ գոյակցած է. եւ այսօր, Միջին Արեւելքի մէջ այդ գոյակցութիւնը նոր արտայայտութիւն գտած է», յայտնելով թէ մեր ժողովուրդի զաւակները միշտ պատրաստ են իրենց հարուստ փորձառութեամբ նպաստելու քրիստոնեայ–իսլամ գոյակցութեան ու գործակցութեան

LEAVE A REPLY

Please enter your comment!
Please enter your name here