Վարդան Օսկանեան Երկիր Մէջ Փոփոխութիւնները Խոչընդոտող Երեք գործօն Կը Տեսնէ

0
24

Հայաստանի նախկին արտաքին գործոց նախարար, «Բարգաւաճ Հայաստան» կուսակցութեան անդամ Վարդան Օսկանեան Ֆէյսպուքի իր էջին մէջ գրառում ըրած է` խօսելով երկիր մէջ փոփոխութիւնները խոչընդոտող գործօններու մասին: Օսկանեանի գրառումը ներկայացուած է ստորեւ.

Այսօր Հայաստանի քաղաքական դաշտը բաժանուած է երկու բեւեռներու: Մէկ բեւեռը` իշխանական, բնականաբար կ’ուզէ վերարտադրուիլ, որ կը նշանակէ գոյավիճակի պահպանում: Միւս բեւեռը, ուր աւելի մեծ թիւով քաղաքական կուսակցութիւններ ներկայացուած են, հանդէս կու գայ համակարգային եւ իրավիճակի կտրուկ փոփոխութեան դիրքերէն:

Եթէ քաղաքական դաշտին մէջ կայ երկու բեւեռ, հասարակութեան մէջ ընդամէնը մէկ բեւեռ է: Բացառութեամբ իշխանական նեղ շրջապատին` հասարակութեան մեծամասնութիւնը երկրին մէջ կը ցանկանայ կտրուկ փոփոխութիւներ տեսնել:

Հարց կը ծագի, եթէ փոփոխութիւնը հասարակութեան ցանկութիւնն է, եւ կան քաղաքական ուժեր, որոնք կրնան առաջնորդել այն, թէ ի՞նչ խոչընդոտ կայ ընտրութիւններու միջոցով հասնելու այդ փոփոխութիւններուն: Ես երեք հիմնական խոչընդոտ կը տեսնեմ.

1. յոյսի եւ հաւատքի բացակայութիւն. հաշուի առնելով մեր անկախութեան երկու տասնամեակներու պատմութիւնը եւ իւրաքանչիւր ընտրութենէ ետք ժողովուրդի հիասթափութիւնը, ներկայիս շատ լուրջ մարտահրաւէր կայ` կարողանալ ժողովուրդի մօտ վերակենդանացնել 91-ի յոյսն ու հաւատքը:

2. Քաղաքական ուժերու շահերու բախում եւ հակասութիւններ: Թէեւ փոփոխութեան կողմնակից բեւեռին մէջ յայտնուած քաղաքական ուժերը կը խօսին համակարգային փոփոխութիւններու մասին, սակայն այդ նպատակի իրականացման ճանապարհին եւ ատիկա ընելու ձեւերուն մէջ անոնք տարբեր մօտեցումներ ունին: Բացի այդ, կայ նաեւ շահերու որոշ բախում այդ գործընթացներու մէջ իւրաքանչիւրի տեղին եւ դերին շուրջ:

3.Ընտրութիւններու արդիւնքը կանխորոշող իշխանական լծակներ: Իւրաքանչիւր ընտրութեան ժամանակ քուէարկութեան արդիւնքներուն վրայ ազդելու նոր, անսպասելի նորարարութիւն ներմուծուած է: Որքան ալ հակադիր ուժերը փորձած են միասնական ջանքերով կանխել զայն, առ այսօր յաջողութիւն չեն ունեցած:

Հակառակ այս խոչընդոտներուն` ես կը կարծեմ, որ իրավիճակի կտրուկ փոփոխութեան հնարաւոր է հասնիլ:Ատիկա բանալին նշածս խոչընդոտներէն երկրորդի վերացումը կրնայ ըլլալ: Հաշուի առնելով մեր իրականացուցած խորհրդակցութիւններու առաջին փուլը, ես այս հարցով որոշ հեռանկար կը տեսնեմ: Մեծամասնական համակարգէն հրաժարելու եւ ընտրական օրէնսգիրքի փոփոխութիւններու երկու կարեւորագոյն հարցերուն մէջ որեւէ տարակարծութիւն չկայ: Ինչ կը վերաբերի 100-տոկոսանոց խորհրդարանական համակարգի անցնելուն, դեռ կան տարակարծութիւններ: Բայց ատիկա չի կրնար խոչընդոտող հանգամանք դառնալ մէկ պարզ պատճառով, որ մեծ հաշուով այդ հարցը պէտք է որոշէ ժողովուրդը` հանրաքուէի միջոցով, իսկ քաղաքական ուժերը ընդամէնը պէտք է համաձայնութեան գան, որ մինչեւ յաջորդ` 2017 թուականի խորհրդարանական ընտրութիւնները հարցը դնեն հանրաքուէի: Եւ քանի որ մենք արդէն համաձայնած ենք ընտրական օրէնսգիրքի բարեփոխման հարցին շուրջ, որով բացառելու ենք ընտրակեղծիքները, բնականաբար` նաեւ հանրաքուէի ընթացքին, ուստի այս պահուն անիմաստ կ’ըլլայ վիճիլ ժողովուրդի կամքին ենթարկուելու կամ չենթարկուելու մասին:

Նախագահական ընտրութիւններուն եւ թեկնածուներու արձանագրութիւններուն քիչ ժամանակ մնացած է: Այնպէս որ` շուտով կ’երեւի` թէ՛ փոփոխութեան, թէ՛ իշխանական բեւեռները պիտի դրսեւորեն քաղաքական այնպիսի հասունութիւն, որ կարենանք արժանապատիւ ձեւով` առանց ցնցումներու, երկիրը դուրս բերել ծանր վիճակէն եւ դնել կայուն զարգացման ճանապարհի վրայ:

 

LEAVE A REPLY

Please enter your comment!
Please enter your name here