ՀԱՅԱՍՏԱՆ ԵՒ ԼԻԲԱՆԱՆ ԿԸ ՍՏՈՐԱԳՐԵՆ ՇԱՏ ՄԸ ՀԱՄԱՁԱՅՆԱԳՐԵՐ

0
65

Հայաստանի Հանրապետութեան նախագահ Սերժ Սարգսեան այսօր առաւօտեան պաշտօնական  հրաւէրով, եռօրեայ այցելութեամբ  ժամանեց Լիբանան։ Պէյրութի  միջազգային  օդակայանին մէջ  պաշտօնական ընդունելութենէն ետք, նախագահ Սարգսեան  մեկնեցաւ Պաապտայի պալա, ուր դիմաւորուեցաւ Լիբանանի նախագահ զօր. Միշէլ Սըլէյմանին կողմէ։

Երկու նախագահները ունեցան առանձնազրոյց  մը, որմէ ետք նախագահ Սերժ Սարգսեան եւ նախագահ Միշէլ Սըլէյման կնքեցին միացեալ ասուլիս մը։ Նախագահ Միշէլ Սըլէյման բարձր գնահատեց Հայաստան-Լիբանան փոխ յարաբերութիւնները, շեշտելով թէ Լիբանան կը յարգէ Հայաստանի գերիշխանութիւնը:Ան ընդգծեց,  որ Լեռնային Ղարաբաղի հակամարտութիւնը միայն խաղաղ միջոցներով կը հասնի իր արդար լուծումին։

Իր կարգին,  նախագահ Սերժ Սարգսեան դրուատեց լիբանանեան իշխանութիւններուն կողմէ հայերուն եւ Հայաստանին հանդէպ ցուցաբերուած յատուկ վերաբերմունքը,  նշելով թէ Հայաստան կը հաւատայ, որ Լիբանան-Հայաստան յարաբերութիւնները կը զարգանան փոխադարձ յարգանքի եւ ըմբռնողութեան մէջ։

Երկու  նախագահները մտահոգութիւն յայտնեցին Սուրիոյ արիւնալի դէպքերուն, յոյս յայտնելով որ Սուրիա խաղաղ լուծման եւ երկխօսութեան ճանապարհով դուրս կու գայ այժմու հակամարտութենէն։

Ապա երկու երկիրներուն միջեւ ստորագրուեցան մշակութային եւ կրթական ոլորտները ընդգրկող շարք մը համաձայնագրեր։

Նշենք թէ Հայաստանի Հանրապետութեան նախագահի պատուիրակութեան մաս կը կազմեն Հայաստանի կրթութեան, մշակոյթի եւ սփիւռքի նախարարները։

 

LEAVE A REPLY

Please enter your comment!
Please enter your name here