Համակողմանի Կրթութիւն Ջամբող «Այբ» Աւագ Դպրոցը Նոր Մասնաշէնքով Կ՛օժտուի

0
45

24 Նոյեմբերին տեղի ունեցած է «Այբ» աւագ դպրոցի նոր մասնաշէնքի բացման արարողութիւնը, որուն ներկայ եղած է հանրապետութեան նախագահ Սերժ Սարգսեանը: Նախագահը շրջագայած է դպրոցին մէջ, մասնակցած Ս. Թարգմանչաց եկեղեցւոյ յուշաքարի օծման արարողութեան: Դպրոցի աշակերտներուն կողմէ, նախագահին գլխաւորութեամբ՝ «Լոյս» հիմնադրամին շնորհուած է շնորհակալագիր՝ իբրեւ բարերարի:
«Այբ» աւագ դպրոցի գործադիր տնօրէն Դաւիթ Սահակեանը լրագրողներուն հետ ունեցած զրոյցին ընթացքին յայտնած է, որ դպրոցի առանձնայատկութիւններէն է ջամբել համակողմանի ամբողջական կրթութիւն, որուն կը միանայ դաստիարակութիւնը։ «Մեր սաները մի շարք սոցիալական ծրագրերում են ընդգրկուած, դպրոցում սովորող երեխաները դառնում են մի ցանցի անդամ, որտեղ կան մարդիկ, ովքեր պատրաստ են ձեռքը բռնած ուղղորդել կեանքում եւ օգնելու կայանալ»,  նշած է ան: Սահակեանի համաձայն, շէնքին տարբեր ըլլալը միտումնաւոր է, որպէսզի երեխաները վաղ տարիքէն կարենան տեսնել գեղեցիկը, յարմարաւէտը: Տնօրէնին համաձայն, դպրոցին վերջին ձեռքբերումներէն է «Ռոբոտիկայի թիմ»ի յաղթանակը «Արմռոբոտիքս» մրցումին: Դպրոցի սաները իրենց ապագան կը պատկերացնեն թէ՛ Հայաստանի մէջ, թէ՛ երկրէն դուրս: Դպրոցը իր կարելին կ՛ընէ, որպէսզի իր սաները դառնան Հայաստանի համար պիտանի մարդիկ:
«Մենք փորձել ենք ստեղծել դարին համահունչ միջավայր՝ ճարտարապետական լուծումներով, տեխնոլոգիական յագեցուածութեամբ: Կարեւորը, սակայն, շէնքը չէ, այլ այն բովանդակութիւնը, որ ներսում, մարդիկ, ովքեր աշխատում են այստեղ, եւ իհարկէ այն պայծառ երեխաները, ովքեր սովորում են այստեղ», դիտել տուած է դպրոցի հոգաբարձուներու խորհուրդի նախագահ Մեսրոպ քահանայ Արամեանը:
Նոր դպրոցի ստեղծման գաղափարը ծագած ու մշակուած է նկատի ունենալով աշխարհի յառաջատար կրթական համակարգերու լաւագոյն բաղադրիչները: Դպրոցին մէջ կ՛ուսանին 148 աշակերտներ: «Այբ» կրթական դպրոցէն ետք կը նախատեսուի կրթական աւանի յաջորդ բաղադրիչներու կառուցումը՝ Սրբոց Թարգմանչաց եկեղեցի եւ համայնքային կեդրոն, Միջին դպրոց, Կրտսեր դպրոց, Մանկապարտէզ, Մետիա արուեստներու կեդրոն, Հանրային այգիներ:
Սրբոց Թարգմանչաց եկեղեցւոյ շինարարութիւնը պիտի սկսի յառաջիկայ տարուան գարնան: Եկեղեցւոյ նախագիծը ընտրուած է միջազգային մրցումի ծիրին մէջ ներկայացուած 50 ճարտարապետական նախագիծերէ: Եկեղեցին պիտի պատկանի Մայր Աթոռ Ս. Էջմիածինին եւ պիտի ծառայէ «Այբ» կրթական աւանին եւ ամբողջ համայնքին:

LEAVE A REPLY

Please enter your comment!
Please enter your name here