Հայաստան՝ Զբօսաշրջային Հետաքրքրական Երկիրներու Շարքին

0
38

«Կլոպ Սփոթզ» միջազգային զբօսաշրջային կազմակերպութիւնը հրապարակած է ցանկը այն տասը երկիրներուն, ուր 2013 թուականին այցելել կը յանձնարարուի զբօսաշրջիկներուն։ Հայաստան այդ տասնեակին մէջ կը գրաւէ հինգերորդ դիրքը: «Հակառակ զարգացած զբօսաշրջային ենթակառուցուածքներուն, Հայաստան յաճախ կը վրիպի մեծ թիւով զբօսաշրջիկներու ուշադրութենէն», գրած է «Կլոպ Սփոթզ»ը։ Ան նաեւ կ՛ընդգծէ, որ Հայաստանը աշխարհի առաջին երկիրն է, որ ընդունած է քրիստոնէութիւնը, եւ որ զբօսաշրջիկներուն համար անիկա մեծապէս հետաքրքրական է իր հնադարեան վանքերով ու եկեղեցիներով: «Անոնք, որոնք կը փափաքին մօտէն ծանօթանալ այս հրաշալի երկիրին գեղեցիկ բնապատկերներուն, նաեւ պիտի հանդիպին անկեղծ ժողովուրդի մը, որ պատրաստ է անվերջանալի կենացներով օղի հիւրասիրելու կամ հիւրերը հրաւիրելու խորովածի սեղան», գրած է «Կլոպ Սփոթզ»ը։
Ընկերութիւնը նաեւ կը յիշեցնէ, որ յառաջիկայ տարուան Յունուարէն սկսեալ Եւրոմիութեան քաղաքացիներուն համար Հայաստանը կը վերցնէ մուտքի արտօնագիրի դրութիւնը՝ աւելի եւս դիւրացնելով զբօսաշրջութիւնը դէպի իր երկիրը։
«Կլոպ Սփոթզ»ի համաձայն, զբօսաշրջութեան իմաստով հետաքրքրական միւս երկիրներն են Փորթուկալը, Մոզամպիքը, Ղըրղզստանը, Փանաման, Ռուանտան, Քուպան, Ուքրանիան, Մալաւին եւ Գանատան։

LEAVE A REPLY

Please enter your comment!
Please enter your name here