Թուրքիոյ Համաձայն՝ «Փեթրիոթ»ները Սուրիոյ Վրայ Թռիչքներու Արգիլեալ Գօտիի Մը Համար Չեն

0
41

Հակադարձելով Սուրիոյ հետ սահմանին վրայ «Փեթրիոթ» տիպի հրթիռներ տեղակայելու նպատակով՝ ՆԱԹՕ-ին կատարուած Թուրքիոյ դիմումին շուրջ մտավախութեանց՝ Թուրքիոյ սպայակոյտի հրամանատարութիւնը Երկուշաբթի, Նոյեմբեր 26-ին յայտարարեց, թէ «Փեթրիոթ»ները պիտի չօգտագործուին Սուրիոյ վրայ թռիչքներու արգիլեալ գօտի մը պարտադրելու նպատակին համար, այլ՝ միայն պաշտպանութեան համար:
Թուրքիոյ վարչապետ Ռեճէպ Թայիփ Էրտողան եւս նման յայտարարութիւն մը կատարած էր անցած շաբաթավերջին՝ նշելով, որ այդ հարցին վերաբերեալ Ռուսիոյ դիրքորոշումը «ճիշդ չէ»:
Նշենք, որ Ռուսիա այդ հարցով Թուրքիան զգուշացուցած էր եւ անոր կոչ ուղղած՝ Սուրիոյ տագնապի քաղաքական լուծման համար աշխատելու: Ռուսիոյ արտաքին գործոց նախարարութեան բանբեր Ալեքսանտր Լուքաշեւիչ յայտնած էր, որ «թուրք-սուրիական սահմանի ռազմականացումը մտահոգիչ ցուցանիշ մը կը նկատուի: Մեր թուրք գործընկերներուն ուղղուած մեր խրատը հետեւեալն է. սուրիական ընդդիմութեան մօտ իրենց ազդեցութիւնը օգտագործել՝ սուրիական կողմերուն միջեւ կարելի եղածին չափ շուտ երկխօսութեան հասնելու համար»:
Ռուսիոյ արտաքին գործոց նախարար Սերկէյ Լաւրով «Մայատին» արբանեակային պատկերասփիւռի կայանէն յայտարարած էր, որ Ռուսիա Սուրիոյ հետ Թուրքիոյ սահմանին վրայ «Փեթրիոթ»ներու տեղակայման դէմ է:
Իրան եւս կտրուկ կերպով դէմ արտայայտուած է հրթիռները Թուրքիոյ մէջ տեղակայելու գաղափարին, իսկ Սուրիոյ իշխանութիւնները «հրահրի»չ որակած են «Փեթրիոթ»ներու կապակցութեամբ Թուրքիոյ դիմումը:
Կ՛ակնկալուի, որ ՆԱԹՕ «Փեթրիոթ»ներու հարցով որոշում մը տայ այս շաբթուան ընթացքին:
Ապահովական գետնի վրայ, «Մայատին»ը կը հաղորդէ, թէ Սուրիոյ հիւսիսարեւելեան շրջաններուն մէջ քիւրտերու եւ Սուրիական ազատ բանակին միջեւ բուռն բախումներ տեղի կ՛ունենան, իսկ «Թայմ» կը գրէ, թէ Հալէպի ճակատամարտին լճացած վիճակը ըմբոստները մղած է այլ շրջաններ անցնելու մասին մտածելու:
Իսրայէլեան ձայնասփիւռի կայանը Երկուշաբթի օր հաղորդեց, որ սուրիական հողամասերէն բռնագրաւուած Կոլանի ուղղութեամբ կրակոցներ արձանագրուած են երկու առիթներով: Կայանը կը նշէ, որ իսրայէլեան բանակը անցեալ շաբաթ եւս նման դէպքերու պարագային չէ հակադարձած:
Իր կարգին, «Նիւ Եորք Թայմզ» գրած է, որ Սուրիոյ մէջ «ալաուիներու ցեղասպանութիւն» կրնայ տեղի ունենալ, եթէ ընդդիմութիւնը իշխանութեան գլուխ անցնի:
Նաեւ, «Ինթըրֆաքս» լրատու գործակալութիւնը հաղորդած է, որ «Սուրիոյ բարեկամներ»ու յաջորդ ժողովը տեղի պիտի ունենայ Դեկտեմբեր 12-ին: Մարոքի արտաքին գործոց նախարարութիւնը հաղորդած էր նախապէս, թէ հաւաքը տեղի պիտի ունենայ Մարոքի մայրաքաղաք Ռապաթի մէջ: Կ՛ենթադրուի, որ հաւաքին մասնակցին առնուազն հարիւր պատուիրակութիւններ՝ արաբական եւ եւրոպական շարք մը երկիրներէ, միջազգային կազմակերպութիւններէ եւ շարժումներէ: Հաւաքը առաջինը պիտի ըլլայ նաեւ սուրիական ընդդիմութեան նորաստեղծ Ազգային համաձայնական մարմինին համար, որուն օրինակութիւնը ապահովելու նպատակով՝ Քաթար նոյն այդ մարմինէն խնդրած է Տոհայի մէջ դեսպան մը նշանակել:

LEAVE A REPLY

Please enter your comment!
Please enter your name here