Ատրպէյճանական Բանտի Մէջ Մահացած Մանուէլ Սարիբէկեանի Փաստաբանը Պատասխան կը Սպասէ

0
61

 Ատրպէյճանական գերութեան մէջ մահացած Մանուէլ Սարիբէկեանի գործով փաստաբանը դիմած է Մարդու Իրաւունքներու Եւրոպական Դատարանի ղեկավարին` վարչական վարոյթ յարուցելու համար: Պատճառը այն է, որ այդ գործով նամակագրութիւնը տարօրինակ կերպով կը ձգձգուի:Այս մասին կը յայտնէ News.am-ը։

Աղբիւրի համաձայն համապատասխան բաժնի անգործութեան մասին դիմումը դատարանի նախագահին ուղարկուած է Սեպտեմբերին: Առայժմ պատասխան չէ ուղարկուած:

Փաստաբանի խօսքով` նամակագրութեան ձգձգման հետեւանքով դիմումի ներկայացման ժամկէտները կը խախտուին: «Եւրադատարանի հետ աշխատում եմ 10 տարի, մի քանի տասնեակ գործեր եմ ներկայացրել, սական երբեւէ նման բանի հետ չեմ բախուել: Ուշագրաւ է, որ մէկ գործում միանգամից եռակի խախտուել է նամակագրութեան փոխանցման ժամկէտը: Դա մտորելու տեղիք է տալիս՚,-նշած է փաստաբանը: Ան կ’ենթադրէ, որ գործի քննութիւնը տապալելու նման փորձերը կրնան ըլլալ ատրպէյճանցի աշխատակիցներու «գործունէութեան՚ արդիւնք:

Մանուէլ Սարիբէկեանի ծնողներու անունով դիմումը Եւրոդատարան փոխանցուած է «արնի կոնսալտ՚ փաստաբանական գրասենեակի կողմէ: Գործը արդէն գրանցուած է դատարանի մէջ:

Յիշեցնենք, որ Մանուէլ Սարիբէկեանը Գեղարքունիքի մարզի Թթուջուր գիւղի բնակիչ էր, իսկ գիւղի անմիջական հարեւանութեամբ կ’անցնի հայ-ատրպէյճանական սահմանը: 2010-ի Սեպտեմբեր 11-ին երեկոյեան ժամը 17-ի սահմաններուն Մանուէլ Սարիբէկեան իր ընկերներուն հետ գացած էր գիւղի Քեղուտ կոչուող հանդամասի ուղղութեամբ` մօտական անտառէն փայտ հաւաքելու եւ իր եւ գիւղի միւս բնակիչներու անասունները փնտռելու նպատակով եւ  չէր վերադարձած:

Սեպտեմբեր 18-ին Ատրպէյճանի լրատուամիջոցները տեղեկութիւն տարածած են, թէ, իբր զինուած ուժերու կողմէ ձերբակալուած է հայ հետախոյզ, որ ահաբեկչական գործողութիւններ կատարելու նպատակով փորձած է հատել Ատրպէյճանի սահմանը, սակայն ձերբակալուած է, իսկ յարձակող խումբի միւս անդամները դիմած են փախուստի: Իր հերթին ատրպէյճանական ANS TV հեռուստաընկերութիւնը պատրաստած է յատուկ թողարկում, ուր ցուցադրուած է Մանուէլ Սարիբէկեանի հարցազրոյցը հեռուստաընկերութեան աշխատակիցի հետ: Սոյն հարցազրոյցը այնուհետեւ տեղադրուած է համացանցի մէջ, ուրկէ ալ Մանուէլի ծնողները տեղեկացած են, որ Մանուէլը կը գտնուի Ատրպէյճան, ձերբակալուած է յատուկ մարմիններու կողմէ եւ որ կը մեղադրուի ահաբեկչութեան փորձի մէջ:

Կարմիր Խաչի Միջազգային Խորհուրդի երեւանեան գրասենեակը փորձած է Ատրպէյճանի իր գործընկերներէն թոյլտուութիւն ստանալ Մանուէլ Սարիբէկեանի հետ հանդիպելու համար, սակայն ատրպէյճանական կողմը մերժած է :

2010-ի Հոկտեմբեր 5-ին Ատրպէյճանի պաշտպանութեան նախարարութիւնը եւ զինուորական դատախազութիւնը համատեղ յայտարարութիւն տարածած են, որ Մանուէլ Սարիբէկեանն անձնասպան եղած է կալանքի տակ գտնուելու ժամնակ: Ըստ պաշտօնական հաղորդագրութեան, ան անձնասպան եղած է Հոկտեմբեր 5-ին, գիշերը ժամը 3-սահմաններուն կախուելով` կալանքի տակ գտնուելու ժամանակ պարանոցին վերնաշապիկէն եւ սաւանէն պատրաստուած օղակ հագցնելու միջոցով: Մօտ մէկ ամիս անց, 2010 թուականի Նոյեմբեր 4-ին ատրպէյճանական իշխանութիւնները Հայաստանին յանձնել են Մանուէլ Սարիբէկեանի դին: Դիակի զննութեամբ պարզուg[ է, որ ան պատշաճ կերպով չէ պահպանուած Ատրպէյճանի մէջ, քանի որ ան եղած է քայքայուած վիճակի մէջ:

Եւրոպական դատարան ներկայացուած գանգատի մէջ կը նշուի, որ անկախ այն հանգամանքէն, թէ ինչ եղած է Մանուէլի մահուան պատճառը, Ատրպէյճան պատասխանատու է իր բացառիկ իրաւազօրութեան ներքոյ` կալանավայրի մէջ գտնուող անձի կեանքի համար:Ինչ կը վերաբերի մարմնական վնասուածքներուն, ապա համաձայնագրի 3-րդ յօդուածի ներքոյ կը վիճարկուի, որ մահունէ առաջ Մանուէլը ենթարկուած է խոշտանգումներու, որմէ ետք կատարուած է անձնասպանութեան կեղծաւորութիւն` յանցագործութեան հետքերը թաքցնելու նպատակով:

Ատրպէյճանի հանրապետութիւնը չէ ապահոված պաշտօնական անկախ հետաքննութեան իրականացում` մահուան եւ խոշտանգումներու փաստերու հիմքով: Աւելին, Ատրպէյճանի իշխանութիւնները կը հրաժարին համագործակցելու Հայաստանի Հանրապետութեան հետ իրաւական պաշտպանութեան միջազգային կառուցակարգի` 1993-ի Մինսքի համաձայնագրի ծիրէն ներս:

LEAVE A REPLY

Please enter your comment!
Please enter your name here