ՀԱՅԱՍՏԱՆԻ ՆԱԽԱԳԱՀ ՍԵՐԺ ՍԱՐԳՍԵԱՆ ԱՆԹԻԼԻԱՍԻ ՄԱՅՐԱՎԱՆՔԻՆ ՄԷՋ

0
65

 Երեքշաբթի 27 Նոյեմբեր 2012-ի առաւօտուն, Հայաստանի Հանրապետութեան Նախագահ Ն. Վ. Սերժ Սարգսեան, ընկերակցութեամբ Հայաստանի Հանրապետութեան Առաջին Տիկնոջ եւ իր պատուիրակութեան անդամներուն, Լիբանան կատարած իր պաշտօնական այցելութեան ծիրէն ներս այցելեց Անթիլիասի Մայրավանքը: Նախագահին կ՛ընկերանային Հայաստանի Արտաքին Գործոց Նախարարը, Բարձրագոյն Կրթութեան Նախարարը, Սփիւռքի ու Մշակոյթի նախարարուհիները, ինչպէս նաեւ պետական այլ բարձաստիճան պատասխանատուներ:

 Վեհարանի մուտքին Ն.Ս.Օ.Տ.Տ. Արամ Ա. Կաթողիկոս ողջունեց Նախագահին այցելութիւնը: ՀՄԸՄ–ի փողերախումբին կողմէ Լիբանանեան ու հայկական քայլերգներու նուագէն ետք, Վեհափառ Հայրապետը, Նախագահն ու ներկաները ուղղուեցան Նահատակաց Յուշարձանը, ուր Նախագահը Հայաստանի Հանրապետութեան անունով ծաղկեպսակ մը զետեղեց եւ ապա Վեհափառ Հայրապետը Հոգւոց արտասանեց հայկական ցեղասպանութեան զոհ մէկուկէս միլիոն նահատակներու հոգիներուն համար:

 Վեհափառ Հայրապետը եւ Նախագահը, Վեհափառի գրասենակին մէջ առանձին հանդիպում մը ունեցան, ու ապա անոնք միացան Վեհարանի Դահլիճին մէջ տեղի ունեցող հիւրասիրութեան: Ներկայ էին, Նախագահի պատուիրակութեան կողքին, Ազգ. Կեդր. Վարչութեան անդամները, Սուրբ Աթոռին Միաբանութիւնը, ներկայ եւ նախկին պետական հայ երեսփոխանները ու  նախարարներ, Լիբանանի թեմի Առաջնորդը եւ Ազգ. իշխանութեան ներկայացուցիչները, երեք քաղաքական կուսակցութեանց պատասխանատուները, ինչպէս նաեւ Լիբանանի հայ գաղութէն ներս գործող ազգային, կրթական, բարեսիրական ու մշակութային կառոյցներու ներկայացուցիչներ:

 Մեր Հայրենիք եւ Կիլիկիա քայլերգներու երգեցողութենէն յետոյ խօսք առնելով Վեհափառ Հայրապետը ըսաւ. .«Մեր Հայրենիք` ազատ անկախ…, Երբ որ բացուին դռներն յուսոյ, ցանկամ տեսնել զիմ ԿիլիկիաՀայաստանի ու Կիլիկիոյ նուիրուած այս օրհներգները Մեծի Տանն Կիլիկիոյ Կաթողիկոսութեան համար սոսկ բառ ու եղանակ չեղան. անոնք դարձան հաւատք ու յոյս, վճռակամութիւն ու տեսիլք: Ա՛յս ոգիով ու յանձնառութեամբ այս Սուրբ Աթոռը գործեց ու ծառայեց մեր ժողովուրդի համայնական կեանքէն ներս: Մեծի Տանն Կիլիկիոյ Կաթողիկոսութիւնը եղաւ խորհրդանիշ հայ ժողովուրդի ցեղասպանութեան` երբ մէկուկէս միլիոն հայեր զոհ դարձան թուրք պետութեան կողմէ ծրագրուած ու գործադրուած ցեղասպանութեան: Մեծի Տանն Կիլիկիոյ Կաթողիկոսութիւնը դարձաւ խորհրդանիշ հաւատքի առաքելութեան ու ազգային ծառայութեան` մեր ազգին ու եկեղեցւոյ հոգեւոր, բարոյական, մշակութային ու ազգային արժէքները ու երազները կենսագործելով մեր ժողովուրդի կեանքէն ներս: Մեծի Տանն Կիլիկիոյ Կաթողիկոսութիւնը դարձաւ խորհրդանիշ հայ ժողովուրդի վերածննդեան` Սփիւռք դարձած մեր ժողովուրդի կեանքը յարութեան շունչով ու վերածննդեան ոգիով թրծելով: Մեծի Տանն Կիլիկիոյ Կաթողիկոսութիւնը դարձաւ խորհրդանիշ ազգային պահանջատիրութեան` հայ ժողովուրդի արդար իրաւունքները պահանջելով ցեղասպան թուրքէն: Մեծի Տանն Կիլիկիոյ Կաթողիկոսութիւնը նաեւ դարձաւ խորհրդանիշ ազատ ու անկախ Հայաստանի. աներազեց, տագնապեցաւ ու պայքարեցաւ որպէսզի պայմաններու բերումով միագոյն դարձած Հայաստանը դառնայ Եռագոյն` ազատ ու անկախ»: Շարունակելով իր խօսքը, Արամ Ա. Կաթողիկոս ըսաւ` «Այսօր, մեր Աթոռը նո՛յն ոգիով, հաւատքով ու նուիրումով կը գործէ, մասնակից դառնալով Հայաստանի ու Ղարաբաղի հզօրացման համազգային առաքելութեան»: Իր խօսքը Պրն. Նախագահին ուղղելով, Վեհափառը ըսաւ. «Սիրելի՛ Պրն. Նախագահ, Մենք մօտէն կը հետեւինք Ձեր աշխատանքներուն. դուք այսօր իրաւատէրն էք հայ ժողովուրդի արդար իրաւունքներուն: Ձեր այցելութիւններուն ու հանդիպումներուն ընթաթցքին կ՛արծարծէք հայոց ցեղասպանութեան հարցը, ինչպէս նաեւ մեր ժողովուրդի բռնաբարուած իրաւունքներու վերականգման հրամայականը: Մենք կը մնանք զօրակից Ձեզի` Ձեր հայրենաշէն ու ազգաշէն ծառայութեան մէջ»:

 

Ապա Վեհափառ Հայրապետը, որպէս ջերմ սիրոյ ու խոր գնահատանքի արտայայտութիւն, Պրն. Նախագահին շնորհեց Մեծի Տանն Կիլիկիոյ Կաթողիկոսութեան «Կիլիկեան Մեծ Խաչի Շքանշան»ը, որ յատուկ է միայն նախագահներու:

 

Վեհափառ Հայրապետի ողջոյնիի խօսքէն յետոյ, խօսք առնելով Պրն. Նախագահը իր ուրախութիւնը յայտնեց Մեծի Տանն Կիլիկիոյ Կաթողիկոսութիւն կատարած իր այցելութեան եւ իրեն հանդէպ ցուցաբերուած ջերմ ընդունելութեան համար: Ան ըսաւ. «Մեզի համար մեծ պատիւ է գտնուել այս Սուրբ Աթոռում եւ Արամ Կաթողիկոսի ձեռամբ ստանալ այս մեծ պարգեւը: Երեւի Հայաստանի Հանրապետութեան նախագահները երջանիկ մարդիկ են, որովհետեւ աշխարհի շատշատ վայրերում արժանանաում են ջերմ ընդունելութեան, որին չեն արժանանում շատշատ աւելի հզօր երկիրներու նախագահները: Հայաստանը հզօր է Սփիւռքով եւ Սփիւռքը հզօր է Հայաստանով: Սա կարգախօս չէ. սա մեր կեանքի բաղկացուցիչ մասն է եւ պատրաստ ենք մեծ ջանքերով ու ճիգերով ի կատար ածել բոլոր իղձերը: Սակայն Լիբանանի հայութիւնը ու յատկապէս այս Սուրբ Աթոռը տարբերում են ո՛չ միայն հայաշատութեամբ այլ մեր իղձերին նուիրուածութեամբ: Ակնյայտ է որ Մեծի Տանն Կիլիկիոյ Կաթողիկոսութիւնը միայն հոգեւոր կեդրոն չէ այլ հայապահպանութեան հզօր աղբիւր է որը զգում է ողջ հայութիւնը»:

 

Նախագահի խօսքէն յետոյ, Վեհափառ Հայրապետը, Պրն. Նախագահը, Առաջին Տիկինը, Միաբանութիւնը եւ հրաւիրեալները ուղղուեցան Մայր Տաճար, ուր տեղի ունեցաւ Հանրապետական Մաղթանք` Վեհափառ Հայրապետին նախագահութեամբ: Անթիլիասի Մայրավանքէն մեկնելէ առաջ, դարձեալ առանձին հանդիպում մը տեղի ունեցաւ Վեհափառին ու Նախագահին միջեւ այս անգամ ներկայութեամբ Նախագահի պատուիրակութեան մաս կազմող նախարարներուն: Հանդիպման ընթացքին արծարծուեցան Հայաստան–Սփիւռք գործակցութիւնը աւելի ամրապնդելու կարելիութիւններուն առնչուած հարցեր:

 

Յայտնենք, որ օր մը առաջ, Պրն. Նախագահի Լիբանան ժամանելէն ու Լիբանանի Հանրապետութեան Նախագահին հետ տեսնուելէն անմիջապէս յետոյ Վեհափառ Հայրապետը հանդիպում մը ունեցած էր Նախագահին հետ, անոր իջեւանած պանդոկին մէջ, եւ ճաշի հիւրը եղած էր Պրն. Նախագահին:

 

LEAVE A REPLY

Please enter your comment!
Please enter your name here