«Ֆրանս 24» Տեսագրութիւն Մը Պատրաստած Է Լեռնային Ղարաբաղի Մասին

0
40

Ֆրանսական «Ֆրանս 24» կայանը Լեռնային Ղարաբաղի վերաբերող տեսագրութիւն մը սփռած է։ Անոր մէջ կ՛ըսուի, որ Ատրպէյճանի կողմէ ռազմական յարձակման պարագային հայկական կողմին պատասխանը պիտի ըլլայ ազդեցիկ, իսկ զէնքը՝ ծանր, հրասայլերով եւ ռազմական սարքերով։ Ասիկա է Լեռնային Ղարաբաղի ուղերձը Ատրպէյճանին։
Թղթակիցը անձամբ ներկայ եղած է Ղարաբաղի մէջ  կայացած զօրավարժութիւններուն: «Այս զօրավարժութիւնը կը կատարուի ատրպէյճանական ուժերէն 10 քիլոմեթր հեռաւորութեան վրայ, երկիր մը, որ միլիառաւոր տոլարներ կը յատկացնէ ռազմական պիւտճէին», նշած է թղթակիցը:
Լեռնային Ղարաբաղի պաշտպանութեան նախարար Մովսէս Յակոբեանը լրագրողին հետ ունեցած զրոյցին ընթացքին յայտնած է, որ իրենք միայն պաշտպանական մարտեր կը վարեն:
«Մեր Բանակի գործառոյթները չպէտք է սխալ ընկալուեն: Պաշտպանութեան բանակը ստեղծուել է ոչ միայն պաշտպանական մարտեր վարելու, այլեւ յարձակողական գործողութիւնների համար», ըսած է Մովսէս Յակոբեանը:
Տեսանիւթին մէջ նաեւ նշուած է, որ զօրավարժութիւնը կը կատարուի Հայաստանի նախագահին մասնակցութեամբ: Ասիկա խորհրդանշական է, քանի որ Հայաստանը իր ֆինանսական օգնութիւնը կը տրամադրէ եւ կ՛երաշխաւորէ այս տարածքիի անվտանգութիւնը:
Ինչո՞ւ շուրջ 20 հազար զինուոր պիտի հսկեն Լեռնային Ղարաբաղին՝ այդ 150 հազար բնակչութիւն ունեցող անքլաւի անվտանգութեան: Հասկնալու համար իրավիճակը՝ լրագրողը դիտողին կ՛ըսէ, թէ պէտք է վերադառնալ 1921 թուական, երբ Խորհրդային Միութիւնը Ղարաբաղի անքլաւը կը կցէր Ատրպէյճանի Խորհրդային Հանրապետութեան: 70 տարի ետք՝ Խորհրդային Միութեան փլուզման զուգահեռ, Ղարաբաղի բնակչութեան մեծամասնութիւնը, որ հայեր էին, կ՛անկախանան Ատրպէյճանէն։
«Սակայն անոնց անկախութեան հռչակագիրը չընդունուեցաւ առանց եռամեայ պատերազմի, որ կողմերէն խլեց 30,000 կեանք եւ դադարեցաւ 1994ին կնքուած զինադադարով», յայտնած է «Ֆրանս 24»ի թղթակիցը։
Ան նաեւ ներկայացուցած է Շուշիի մէջ բնակող հայ տեղահանուածները, որոնք փախուստ տուած են Ատրպէյճանէն 1988 թուականի հայկական ջարդերու լոյսին տակ: Թղթակիցը կը յիշեցնէ, որ Լեռնային Ղարաբաղի բանակցութիւններուն եւ միջազգային միջնորդութեան 18 տարիները հեռու են տեսանելի կամ անտեսանելի արդիւնքներէ: Անդրադարձ կատարուած է նաեւ ղարաբաղեան–ատրպէյճանական սահմանին վրայ հնչող կրակոցներուն:
«Ասիկա ամէն ինչ է, բայց ոչ սառեցուած հակամարտութիւն», կ՛ամփոփէ «Ֆրանս 24»ը։

LEAVE A REPLY

Please enter your comment!
Please enter your name here