Իրաք-Թուրքիա Յարաբերութիւնները Լարուած Կը Մնան

0
46

Անգարայի ու Պաղտատի միջեւ դիւանագիտական յարաբերութիւնները լարուած վիճակ կը պարզեն, քանի որ Թուրքիա տակաւին կը մերժէ Իրաքի յանձնել նախկին փոխնախագահ Թարըք Հաշիմին, որ Թուրքիոյ մէջ ապաստանած է եւ որուն դէմ մահապատիժի վճիռներ արձակուած են սիւննի-շիի բախումներ հրահրելու մեղադրանքով։ Իրաքի վարչապետ Նուրի Մալիքի, որուն յանձնարարութեամբ տնտեսական պատժական միջոցառումներ որդեգրուած էին Թուրքիոյ դէմ, նոր քայլեր եւս առած է Անգարայի դէմ՝ ըստ «Հապեր 7» լրատուական կայքին:

Մալիքի Իրաքի բոլոր նախարարութիւններուն ղրկած է շրջաբերական մը՝ յանձնարարելով, որ նախարարները ու բարձրաստիճան պաշտօնեաները չընդունին Պաղտատի մօտ Թուրքիոյ դեսպանատան կամ հիւպատոսարաններու հրաւէրները եւ չմասնակցին անոնց կողմէ կազմակերպուած ընդունելութիւններու։
Յիշեցնենք, որ Իրաք-Թուրքիա յարաբերութիւնները աւելի վատթարացան, երբ Թուրքիոյ արտաքին գործոց նախարար Ահմէտ Տաւուտօղլու, առանց Պաղտատի կառավարութենէն արտօնութիւն պահանջելու, այցելեց իրաքեան Քիւրտիստանը ու հանդիպումներ ունեցաւ շրջանի ղեկավարներու հետ։ Պաղտատ դժգոհ է նաեւ այն բանէն, որ առանց իր արտօնութեան՝ Թուրքիա քարիւղի համաձայնագիրներ ստորագրած է քրտական իշխանութեանց հետ եւ քարիւղ կը ներածէ հիւսիսային Իրաքէն։

 

LEAVE A REPLY

Please enter your comment!
Please enter your name here