ԱՄՆ Հայ Դատի Յանձնախումբը Հետեւողական Պիտի Ըլլայ Օպամայի Տուած Խոստումներու Իրականացման Հարցով

0
23

ԱՄՆ-ի Հայ Դատի յանձնախումբը Նոյեմբեր 6-ին կայացած նախագահական ընտրութիւններէն ետք պիտի շարունակէ աշխատանքները թէ նորընտիր նախագահին, թէ Քոնկրէսին հետ: Այս մասին «Արմենփրէս»-ին նշած է ԱՄՆ Հայ Դատի յանձնախումբի լրատուութեան պատասխանատու էլիզապէթ Չուլճեան: Աշխատանքները պիտի իրականացուին ի նպաստ հայկական հարցերուն` ըլլայ ԱՄՆ-Հայաստան կապերու հզօրացումը, Լեռնային Ղարաբաղի հարցի արդար լուծումը, թէ Հայոց Ցեղասպանութեան հարցը: Չուլճեանի խօսքով` իրենք հետեւողական պիտի ըլլան նախագահ Պարաք Օպամայի` դեռ 2008-ին տուած խոստումներու իրականացման հարցով, պիտի աշխատին թէ նախագահական վարչակազմին, թէ գոնկրէսական կազմերու հետ:

Չուլճեան նշած է նաեւ, որ քոնկրէսական տարին կը վերջանայ: Յունուարին արդէն նոր նախագիծեր պիտի ներկայացուին յաջորդ Գոնկրէսին: Արդէն աշխատանքներ կը տարուին այդ ուղղութեամբ: «Անշուշտ, պիտի շարունակենք կոչ ուղղել նախագահին եւ, ընդհանրապէս, ամերիկեան կառավարութեան` ճանչնալու Հայոց Ցեղասպանութիւնը: Աւելին, պիտի շարունակենք պնդել, որ Թուրքիոյ կառավարութեան կողմէ գողցուած հայկական, ինչպէս նաեւ բոլոր քրիստոնեայ եկեղեցիները` ըլլան անոնք ասորական, յունական, թէ այլ, վերադարձուին իրենց տէրերուն»,- ըսած է ան:

Դեռ 2011-ին ԱՄՆ Ներկայացուցիչներու պալատը բանաձեւ ընդունած է այդ հարցով, սակայն մինչեւ այսօր չնչին թիւով եկեղեցիներ վերադարձուած են, թէեւ վերանորոգումներ կատարուած են: Չուլճեանի խօսքով` անհրաժեշտ է պնդել, որպէսզի ԱՄՆ-ի ԱԳ նախարարութիւնը լսէ եկեղեցիները վերադարձնելու Ներկայացուցիչներու պալատին կոչը:

ԱՄՆ Հայ դատի յանձնախումբը ԼՂ հարցի առնչութեամբ պիտի շարունակէ լուծումներ փնտռել, ընդլայնել ամերիկեան օժանդակութիւնը դէպի Արցախ: Մինչ հիմա այդ օժանդակութիւնը կազմած է երկու միլիոն տոլար: Նախորդ տարի Ներկայացուցիչներու պալատի Արտաքին օժանդակութեան ենթայանձնախումբը կոչ ըրած է, որ հինգ միլիոնի հասնի, թէեւ պիւտճէի կազմաւորման գործընթացը աւարտած չէ: «Հայ դատի յանձնախումբը պիտի շարունակէ պնդել, որ այդ հինգ միլիոնը հաստատուի վերջնականօրէն, ինչպէս նաեւ բարձր գումարներ ուղղուին դէպի Հայաստան` առնուազն քառասուն միլիոնի չափով»,- ըսած է ան: Չուլճեան նշած է, որ իրենք պիտի պահանջեն կրճատել Ամերիկայի ռազմական որեւէ օժանդակութիւն Ատրպէյճանին` նկատի ունենալով վերջինիս ռազմական մտադրութիւնները Հայաստանի եւ Արցախի հանդէպ:

Օրակարգային պիտի ըլլայ նաեւ սուրիահայութեան օժանդակութեան հարցը: Նախորդ տարի Գոնկրէսը կոչ ըրած է ԱԳՆ-ին` գումարներ հայթայթել գաղութին օժանդակելու համար` ըլլայ ատիկա մարդասիրական օգնութիւն Սուրիոյ մէջ, թէ Սուրիայէն հեռացածներուն, որոնք հիմնականօրէն հաստատուած են Հայաստան: ԱՄՆ Հայ դատի յանձնախումբը պիտի շարունակէ աշխատանքները ԱԳ նախարարութեան հետ` վստահեցնելով, որ Սուրիոյ համար հայթայթուած գումարները կը հասնեն Սուրիոյ բախումներու հետեւանքով մեծապէս տուժած ազգային փոքրամասնութիւններուն:
Անդրադառնալով ամերիկահայ գաղութի տեղային խնդիրներուն` Չուլճեան նշած է, որ անոնք նոյնն են, ինչ որ բոլոր ամերիկացիներու համար. տնտեսական իրավիճակի հզօրացում, որ հայ գաղթականները կը փնտռեն, լաւ դպրոցներ իրենց շրջաններու մէջ, աշխատանք եւ այլն: Սակայն ամերիկահայ գաղութը առաւելապէս հակուած է բարձրացնելու համահայկական խնդիրները:

LEAVE A REPLY

Please enter your comment!
Please enter your name here