Լիբանանի Հայ Համայնքը Սփիւռքի Հոգեւոր Կեանքի, Ազգային-քաղաքական Գործունէութեան Կեդրոնն է. ՀՀ Նախագահ

0
18

Նախագահ Սերժ Սարգսեան երէկ երեկոյեան Պէյրութի մէջ հանդիպում ունեցած է Լիբանանի հայ համայնքի ներկայացուցիչներու հետ: Հանդիպման մասնակիցներուն ուղղուած իր ելոյթին մէջ նախագահը նշած է, որ մշտապէս կը հպարտանայ Լիբանանի` ամուր, կենսունակ ու ստեղծագործ հայկական համայնքով եւ մեծ ուրախութեամբ եւ հոգիի ջերմութեամբ ամէն անգամ կ’այցելէ Լիբանան, կը հանդիպի այնտեղ ապրող մեր հայրենակիցներուն հետ, կը յայտնէ նախագահի մամլոյ ծառայութիւնը:

Հայ-լիբանանեան բարեկամութիւնը, Սերժ Սարգսեանի խօսքով, հիմնուած է կարեւոր սկզբունք-գաղափարի մը վրայ` ատիկա լիբանանահայերու յարգանքն է Լիբանան պետութեան եւ Լիբանանի պետութեան յարգանքը` հայու հանդէպ: Հանրապետութեան նախագահը նշած է, որ հպարտ է նաեւ Լիբանանի կառավարութեան եւ խորհրդարանին մէջ հայ նախարարներու եւ պատգամաւորներու ներկայացուածութեան համար եւ կոչ ըրած է ըլլալ համախմբուած եւ գործել համակարգուած ձեւով: «Լիբանանի հայ համայնքը եղել եւ շարունակում է մնալ Սփիւռքի հոգեւոր կեանքի, ազգային-քաղաքական գործունէութեան կենտրոն, հայի լուսաւորչական միտքը սնող երակ:

«Ձեր համայնքը իրաւատէր է փառահեղ պատմութեան: Մենք երախտապարտ ենք բոլոր այն նուիրեալներին, ում անխոնջ գործունէութեան, յամառ ջանքերի շնորհիւ Լիբանանում պահպանուել, զարգացել եւ գործում են բազմաթիւ հայկական կազմակերպութիւններ, մշակութային ու հոգեւոր կառոյցներ, եկեղեցիներ ու կրթօճախներ, երիտասարդական, բարեգործական ու կանանց միութիւններ, հայագիտական կեդրոններ:

«Դուք հարուստ էք, այո՛, հարուստ` հոգեպէս եւ մշակոյթով, հարուստ մարդկային ներուժով: Այս համայնքում կողք կողքի, այսքան արգասաբեր գործում են Հայ Եկեղեցու երեք յարանուանութիւնները` Մեծի Տանն Կիլիկիոյ կաթողիկոսութիւնը, Տանն Կիլիկիոյ Կաթողիկէ Հայոց պատրիարքարանը եւ Հայ Աւետարանական եկեղեցին: Շնորհակալութիւն Ձեզ, հոգեւոր Հայրեր, որ իւրաքանչիւրդ ձեր կրօնական համայնքում ծաւալում էք ազգանուէր եւ հայապահպան գործունէութիւն, նպաստում էք համայնքի ազգային, մշակութային կեանքի վերելքին` սերմանելով սէր ու հաւատարմութիւն հայութեան, հայրենիքի, հայոց պետականութեան հանդէպ»,- ըսած է նախագահ Սերժ Սարգսեան:

Դիմելով հանդիպումին ներկայ եղող հոգեւորականներուն, հասարակական գործիչներուն, ուսուցիչներուն, արուեստագէտներուն` նախագահ Սերժ Սարգսեան շնորհակալութիւն յայտնած է անոնց, որ համաշխարհայնացման այս ժամանակաշրջանին, հայրենիքէն հեռու կը շարունակուին դաստիարակել հայախօս, հայրենասէր ու ազգասէր սերունդ. սերունդ, որուն ճակատագիրը անքակտելի կապերով միահիւսուած է ազգի ճակատագրին:
Հանրապետութեան ղեկավարը երախտագիտութեան արժանի համարած է Սուրիոյ հայ համայնքի փրկութիւնը համազգային խնդիր համարող լիբանանահայութեան, Լիբանանի հայկական կազմակերպութիւններու վերաբերումը եւ հոգածութիւնը Լիբանան ապաստանած Սուրիոյ մեր հայրենակիցներուն հանդէպ: Սերժ Սարգսեան եւս մէկ անգամ ընդգծած է, որ Հայաստանի Հանրապետութիւնը նոյնպէս իւրաքանչիւր սուրիահայու կողքին է` թէ՛ Սուրիոյ եւ թէ՛ Հայաստանի մէջ:
Լիբանանի հայ համայնքի հետ հանդիպումին նախագահը խօսած է նաեւ համայնքի մեծ ներուժի մասին, որուն լիարժէք եւ արդիւնաւէտ օգտագործումը հնարաւորութիւն կու տայ արձանագրել նոր յաջողութիւններ հայ-լիբանանեան յարաբերութիւններու զարգացման, Հայոց Ցեղասպանութեան ճանաչման եւ դատապարտման, համազգային միւս հիմնախնդիրներու լուծման ճանապարհին:

Սերժ Սարգսեան ընդգծած է, որ լիբանանահայերը Հայաստանի կողքին եղած են 21-ամեայ անկախ Հանրապետութեան բոլոր դժուարին պահերուն: Արցախեան գոյամարտի, երկրաշարժի, արհաւիրքներու դժուար օրերուն զօրաւիգ եղած են եւ սատարած Հայաստանին ու Արցախին, նպաստած մեր Հայրենիքի կայացման, աջակցած երկրի տնտեսական-քաղաքական յառաջընթացին: «Պէտք է ուրախութեամբ նշեմ, որ լիբանանահայերի շրջանում նկատւում է Հայրենիքի հանդէպ հետաքրքրութեան, վստահութեան աճ, որն արտայայտւում է նաեւ Հայաստանի Հանրապետութեան քաղաքացիութիւն ստանալու համար դիմումների աճով: Եթէ 2010 թուականին ՀՀ քաղաքացիութիւն է ստացել ընդամէնը 200-ից աւելի լիբանանահայ, ապա 2011թ. այդ թիւը գրեթէ տասնապատկուել է, եւ այդ միտումը շարունակւում է առ այսօր: Ի հարկէ, հասկանալի է, որ Հայաստանի քաղաքացիութիւն ստանալը Հայաստանում մշտական բնակութիւն հաստատելը չէ. հայկական անձնագիրը ուղղակի իրաւական կապն է պետութեան հետ: Անձնագիր, որը թէ՛ իրաւունքներ է ընձեռում եւ թէ՛ պատասխանատուութիւն սահմանում:

«Կարծում եմ, կը համաձայնէք, որ աշխարհում չկայ որեւէ երկիր, որտեղ բացակայում են խնդիրները: Հայաստանում էլ դրանք քիչ չեն: Սակայն, քիչ չեն նաեւ ձեռքբերումները: Այսօր, ճիշտ է, Հայաստանը շարունակում է զգալ ձեր կարիքը, բայց ի զօրու է նաեւ աջակցել ու սատար լինել ձեզ: Մեր ժողովրդի նուիրական պետութեան կայուն զարգացումն ու վերելքն այլեւս անշրջելի են: Մեր անկախ պետականութեան բոլոր նուաճումները նաեւ տասը միլիոն հայութեան աշխատանքի, պայքարի, ներդրման ու ջանքերի արդիւնքն են: Հայրենիք-Սփիւռք գործակցութիւնն այսօր նոր բովանդակութիւն եւ ռազմավարական նշանակութիւն է ստացել»,- ըսած է Հայաստանի նախագահը:

Նախագահ Սերժ Սարգսեան լիբանանահայ համայնքի ներկայացուցիչներուն հետ խօսած է Հայաստանի արտաքին եւ ներքին օրակարգային կարեւոր խնդիրներու մասին, ներկայացուցած յառաջիկայ ծրագիրները:

«Մենք պէտք է կարողանանք ընթանալ ժամանակին համաքայլ եւ այսօր կերտել մեր սերունդների հայեցի ապագան, Սփիւռքի ու Հայրենիքի միասնական ապագան: Մենք բոլորս պէտք է առաջնորդուենք ոչ թէ «ինչո՞ւ ես», այլ` «ո՞վ, եթէ ոչ ես» նշանաբանով»,- Լիբանանի հայ համայնքի հետ հանդիպումի ընթացքին իր ելոյթի աւարտին ըսած է նախագահ Սերժ Սարգսեան:

LEAVE A REPLY

Please enter your comment!
Please enter your name here