Սուրիահայութիւնը Դէմ Է Եղբայրասպան Կռիւներուն

0
37

Սուրիոյ Բերիոյ Թեմի Ազգային իշխանութիւններու ներկայացուցիչ Կարօ Եուզպաշեան yerkir.am-ի հետ տուած է հարցազրոյց մը, որ կը ներկայացնենք ստորեւ.

Արդէն բաւական ժամանակ է` կերկարի Սուրիոյ ճգնաժամը: Ինչպիսի՞ն է հայ համայնքի կացութիւնը` հոգեբանական, տնտեսական, արտագաղթի եւ այլ առումներով:
– Հայ համայնքը համեմատաբար կայուն վիճակի մէջ է` հակառակ տնտեսական եւ այլ տագնապալի իրավիճակներուն: Կան աշխատանքի դժուարութիւններ, որոնց պատճառով անհատական բնոյթի գաղթի երեւոյթներ տեղի կ’ունենան:

Այս դժուարին պայմաններուն մէջ ազգային կառոյցները կրնա՞ն դիմագրաւել նոր մարտահրաւէրները, լուծել համայնքին առօրեայ խնդիրները:
-Ազգային կառոյցները յաջողութեամբ կը կատարեն իրենց ազգային պարտականութիւնը` հասնելով ժողովուրդի բազմազան կարիքներու բաւարարման:

– Այս փորձութեան պահուն սուրիահայութիւնը ամբողջ հայութեան ուշադրութեան կարիքը կը զգա՞յ : Ի՞նչ ակնկալիքներ կան աշխարհասփիւռ հայութենէն, մասնաւորապէս` Հայաստանի հանրապետութենէն:
– Նկատելի են ամբողջ հայութեան օրըստօրէ աւելցող նախաձեռնութիւնները: Ի մասնաւորի` բարոյական եւ նիւթական զօրակցութիւնը: Այս բոլորին կողքին Հայաստանի Հանրապետութիւնը յատուկ ուշադրութիւն կը ցուցաբերէ Հայաստանի մէջ գտնուող սուրիահայ քաղաքացիներու նկատմամբ` ստեղծելով անոնց համար բազմապիսի հնարաւորութիւններ` կեցութեան, առողջապահութեան, կրթութեան, աշխատանքի եւ այլն:

Իսկ ինչպէ՞ս կիրականացուի օգնութիւններու բաշխումը: Նախ` ո՞ւր կը կուտակուին անոնք, որո՞նք կը տնօրինեն եւ ի՞նչ սկզբունքով կը բաշխեն: Այս գործընթացին մէջ կառաջանա՞ն բարդութիւններ ու դժգոհութիւններ, թէ այդպիսի խնդիրներ չկան:
– Ազգային իշխանութիւններու նախաձեռնութեամբ կազմուեցաւ սուրիահայութեան շտապ օգնութեան կեդրոնական մարմինը` իր գործադիր ենթայանձնախումբերով: Հալէպի թէ շրջանի մէջ կ’իրականացուի առաքուած օգնութեան բաշխումը: Յաղթահարելով դժուարութիւնները` այս գործընթացը օրէ օր կը կատարելագործուի: Յիշեմ, որ Հայաստանի մէջ ստեղծուած «Օգնիր եղբօրդ» նախաձեռնութեան կողմէ, ինչպէս եւ Հայաստանի ու Արցախի ժողովուրդին, գործարար շրջանակներու օժանդակութեամբ, երեք հանգրուանով ստացած ենք աւելի քան 30 թոն բեռ` բաղկացած հիմնականօրէն սննդամթերքէ եւ դեղորայքէ: Այս բեռը արդէն բաժնած ենք Սուրիոյ հայ եւ ոչ հայ քաղաքացիներու: Երեւոյթը արժանացած է համապատասխան գնահատանքի:

Խօսակցութիւններ կան, թե օգնութիւնը ժամանակին տեղ չի հասնիր:
– Սփիւռքահայ տարբեր գաղթօճախներէ հասնող դրամական օժանդակութիւնները կը կուտակուին Կիլիկիոյ կաթողիկոսութեան յատուկ հաշուեհամարի մը: Անոնք մեր պահանջով եւ կարիքներէն թելադրուած, յստակ ժամանակացոյցով կը փոխանցուին մեզի` օգտագործման համար: Բնականաբար, յարմար ժամանակի մէջ Բերիոյ թեմի ազգային իշխանութիւնը այս ամէնուն մասին պիտի ներկայանայ ամբողջական հաշուետուութեամբ:

Ներկայիս Սուրիան վերածուած է հակամարտող հոսանքներու բախման դաշտի: Այս պայքարի մէջ հայութիւնը ինչպէ՞ս կրնայ խուսափիլ ջրապտոյտի մէջ յայտնուելէ: Ինչպէ՞ս կրնայ խուսափիլ իր դէմ ուղղուած` այս կամ այն կողմի թշնամանքէն:
– Սուրիոյ մէջ սուրիահայութիւնը ճանչցուած է եւ ապրած է իբրեւ պարկեշտ քաղաքացի, մասնակցած է երկրի բարգաւաճման աշխատանքներուն եւ այսօր, իբրեւ Սուրիոյ քաղաքացի, դէմ է եղբայրասպան կռիւներուն, երկրի պառակտման, կողմ է Սուրիոյ տարածքային ամբողջականութեան պահպանման եւ խաղաղ միջոցներով տարակարծութեան լուծման:

 

LEAVE A REPLY

Please enter your comment!
Please enter your name here