Եգիպտոսի Արդարադատութեան Համակարգը Եւս Կը Դատապարտէ Նախագահին Քայլերը

0
57

Եգիպտոսի երկու բարձրագոյն ատեաններու դատաւորները գործադուլ յայտարարեցին՝ բողոքելով նախագահական որոշումները արդարադատութեան համակարգի հակակշիռէն դուրս հանելու շուրջ նախագահ Մուհամմատ Մորսիի անցեալ շաբթուան որոշումին դէմ, որուն հետեւանքով բազմաթիւ դատաւորներ եւս գործադուլ հռչակած են:
Չորեքշաբթի օր հարիւրաւոր ցուցարարներ շարունակեցին վեց օր առաջ սկսած բողոքի ցոյցերը՝ ընդհարումներ ունենալով ոստիկանութեան հետ:
Մէկ օր առաջ երկու հարիւր հազար եգիպտացիներ Գահիրէի Թահրիր հրապարակին վրայ բողոքի հսկայ ցոյց մը կատարած էին Մորսիի եւ անոր Իսլամ եղբայրութիւն կուսակցութեան դէմ: Տասնեակ հազարաւոր եգիպտացիներ նոյնպիսի բողոքի ցոյց մը կատարեցին Աղեքսանդրիոյ մէջ, ուր Մորսիի համակիրներուն հետ բախումներ տեղի ունեցան:
Մորսի, ջանալով տագնապը մեղմացնել՝ կը պնդէ, թէ իր նոր լիազօրութիւնները սահմանափակ կերպով պիտի գործածէ, սակայն անոր հակառակորդները կը պահանջեն, որ ան իր հրամանագիրը չեղեալ համարէ:
Մորսիի համակիրները կը պնդեն, թէ նման լիազօրութիւններ հարկաւոր են՝ նախկին վարչակարգի համակիր դատաւորներու հակակշիռին տակ մնացող արդարադատութեան համակարգին տիրապետելու համար, յիշեցնելով, որ անոնք նոյն դատաւորներն էին, որոնք խորհրդարանը լուծած էին:

 

LEAVE A REPLY

Please enter your comment!
Please enter your name here