Թուրքիա Անհանգստացած է Ներկայացուցիչներու Պալատի Արտաքին Յարաբերութիւններու Յանձնաժողովի Նախագահի Պաշտօնին Էտ Ռոյսի Ընտրութեամբ

0
40

ԱՄՆ Ներկայացուցիչներու պալատի Արտաքին յայաբերութիւններու յանձնաժողովի ղեկավար դարձած է Հայաստանի Աջակցութեան խումբի համանախագահ հանրապետական էտ Ռոյսը: Ինչպէս կը հաղորդէ ANCA-ն, Ռոյսի թեկնածութիւնը առաջարկած է Պալատի խօսնակ Ճոն Պոներ:

«Իբրեւ արտաքին գործերու յանձնաժողովի անդամ, գոնկրէսական Ռոյսը հաւատարիմ մնացած է մարդու իրաւունքներու հիմնական սկզբունքներուն. ատիկա կը վերաբերի նաեւ Հայոց ցեղասպանութեան ճանաչումին: Ան նաեւ կողմ հանդէս եկած է Թուրքիոյ կողմէ առգրաւուած քրիտոնէական եկեղեցիներու եւ ունեցուածքը վերադարձնելուն: Յուսով ենք, որ յաջորդ Գոնկրէսին մէջ եւս Հայոց հարցի վերաբերեալ համագործակցութիւնը կը շարունակուի»,-ընդգծած է ANCA-ի նախագահ Քէն Խաչիկեան:

Իսկ ԱՄՆ Ներկայացուցիչներու պալատի Արտաքին յարաբերութիւններու յանձնաժողովի նախագահի պաշտօնին Էտ Ռոյսի ընտրութիւնը անհանգստացուցած է Թուրքիան: Այս մասին՝ ըստ «Արմենփրես»-ի՝ իր ընթերցողներուն կը յայտնէ թրքական Haberler.com-ը: Ռոյսը, որ միաժամանակ կը հանդիսանայ Գոնկրէսի Հայկական հարցերով յանձնախումբի համանախագահը, մեծ աւանդ ունի ԱՄՆ Քոնկրէսի մէջ հակաթրքական զեկոյցներու պատրաստման ու ընդունման գործին մէջ:

Պարբերականը կը գրէ, որ Ռոյս ընտրուած է հայկական լոպպիստական կազմակերպութիւններու աջակութեան շնորհիւ` փոխարինելով 2010 թուականէն այս պաշտօնին վրայ գտնուող թրքամէտ Ռոս Լեհտինընը: Լրատուամիջոցը կը յիշեցնէ, որ Ռոյս այն անձերէն էր, որ ներկայացուցած էր Ներկայացուցիչներու պալատի Արտաքին յարաբերութիւններու յանձնաժողովի կողմէ ընդունուած «Եկեղեցիներու վերադարձը» վերնագիրով զեկոյցը: Զեկոյցը կը պարտաւորեցնէր Թուրքիային «յարգանք ցուցաբերել երկրի մէջ քրիստոնեաներու իրաւունքներուն նկատմամբ», իսկ զեկոյցին ներկայացման ժամանակ Ռոյս խստօրէն կը մեղադրէր Թուրքիան` քրիստոնեաներու ազատութիւնները ոտնահարելուն մէջ:

«Այս բոլորին հետ մէկտեղ Ռոյս այն մարդոցմէ էր, որ իր ստորագրութիւնը դրած էր Օպամային ուղղուած նամակին տակ, ուր կոչ կը կատարուէր ապրիլքսանչորսեան յայտարարութեան մէջ ճանչնալու Հայոց ցեղասպանութիւնը»,-կ’եզրափակէ Haberler.com-ը:

LEAVE A REPLY

Please enter your comment!
Please enter your name here