Խօսք Տոքթոր Հրայր Սրապեանի Յիշատակին

ՅԱՐՈՒԹԻՒՆ ԻՍԿԱՀԱՏԵԱՆ

Հայոց ցեղասպանութեան կենդանի զոհերէն` տոքթ. Յովհաննէս Յակոբ Սրապեանի երէց որդին էր տոքթ. Հրայր Մկրտիչ Սրապեանը, որ մեզմէ բաժնուեցաւ 2017-ի Հայկական Սուրբ Ծնունդի առաւօտը, վիշտի մէջ թողելով սիրելի ազգականներ եւ բարեկամներ: Եգիպտոսի պետական համալսարանի Բժշկական դպրոցէն շրջանաւարտ` 1959-ին, երիտասարդ Հրայր Սրապեան Իրլանտա կը մեկնի մասնագիտանալու համար վիրաբուժութեան եւ մարմնի թմրագիտութեան մէջ: Ան կը գործէ իբրեւ բժիշկ Հոլանտայի եւ ապա Լիբանանի մէջ` մինչեւ 2008 թուական:

Թէեւ տոքթոր Սրապեանի կեանքի ասպարէզը եղած է բժշկութիւնը, ան շատ մօտէն հետաքրքրուած է ազգային հարցերով, հայոց եւ միջազգային պատմութեամբ: Յարատեւ կարդացող մըն էր ան: Տոքթ. Հրայր Սրապեան իր տեսակէտները կը բաժնէր բարեկամներու հետ` երկար զրոյցներու ընթացքին: Սրապեան կը հաւատար, որ զինեալ պայքարով կարելի է Հայկական հարցին լուծում գտնել առանց բացառելու անշուշտ դիւանագիտական գործունէութիւնը: Ան կը զմայլէր Անդրանիկի, Դրոյի եւ Նժդեհի գործունէութեան եւ նուիրուածութեան վրայ: Յաճախ կը յիշէր Արշաւիր Շիրակեանն ու միւս հերոսները, որոնք արդար ձեռքերով զգետնեցին Հայոց ցեղասպանութեան պատասխանատու պարագլուխ բորենիները:

Հայոց ցեղասպանութեան հանդէպ տոքթ. Հրայր Սրապեանի խորունկ հետաքրքրութեան աղբիւրը անոր հայրն էր` տոքթոր ատամնաբուժ Յովհաննէս Յակոբ Սրապեանը: Վերջինս Խարբերդի Հիւսէյնիկ գիւղը ծնած էր, աւարտած` Եփրատ քոլեճը եւ 1915-ի  ամրան Հայոց Գողգոթայի ճանապարհէն յաջող կերպով փախուստ տուած ու անցած էր Պէյրութ, ուր մտած էր Սուրիական աւետարանական քոլեճի (ներկայիս` Պէյրութի ամերիկեան համալսարան) Բժշկական դպրոցը եւ վկայուած իբրեւ ատամնաբուժ-վիրաբուժ: Յովհաննէս  բռնագաղթի իր յուշերը գրի առած էր փոքր տետրակներու մէջ եւ բերանացի ալ պատմած էր իր զաւակներուն: Հրայր փոքր հասակէն լսելով իր հօր եւ համայն հայոց ոդիսականը, զայրոյթով լեցուած էր եւ յաճախ իր ընդվզումը կը յայտնէր: Հրայր իր հօր խոստացած էր անոր յուշերը հրատարակել գրքոյկով մը, որուն պատրաստութեան համար ան տքնեցաւ իր կեանքին վերջին տարիները: Հրայր Սրապեան մեկնեցաւ այս աշխարհէն, երբ տակաւին իր հօր յուշերը չէին հրատարակուած, սակայն գրեթէ վերջնական կազմի մը մէջ դրուած էին: Այդ գիրքը` «Թուրքիոյ գենէն տարագրութիւն, յուշք նամականի» շուտով լոյս կը տեսնէ:

Տոքթ. Հրայր Սրապեանի մեկնումը իր բարեկամական եւ ազգականական շրջանակին մէջ մեծ բացութիւն մը թողուց:

Հանգիստ նինջ յարգելի եւ  շատ սիրելի տոքթ. Հրայր Սրապեան:

Պէյրութ, 25 յունուար 2017

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>